Skipulags- og byggingarnefnd II

6.  Byggðaráð Norðurþings, fundargerð 125. fundar, 2. júlí 2010.

6.1.  Óskað er eftir breytingu á orðalagi í kafla 25.7.3 um tækfæri á reit 2.08, Skuld.

Viðbrögð: Skipulags- og byggingarnefnd samþykkir að texti kaflans verði eftirfarandi: „Á stalli í miðjum bakkanum hefur verið komið fyrir gömlu uppgerðu húsi, Skuld, sem er nýtt sem kaffihús. Í gildi er deiliskipulag þar sem heimilt er að byggja eina hæð á stallinum á milli verbúða og húss björgunarsveitarinnar (Nausts). Staðurinn er hinsvegar skjólgóður og snýr vel við sólu og því upplagður fyrir verönd í tengslum við kaffihús eða veitingastað. Viðhald stallsins gerir einnig bakkann áhugaverðan út frá ásýnd og upplifun. Deiliskipulag ætti því að endurskoða þannig að hluti reitsins  megi vera opinn og nýttur sem útisvæði. Þá er hvort heldur sem er hægt að gera ráð fyrir að Skuld standi áfram eða að byggt verði nýtt einnar hæðar hús á hluta reitsins."

6.2.  Felld verði út setning um varðveislugildi skúra smábátasjómanna á Hafnarstétt 5 í kafla 25.8.3, reit 3.04.

Viðbrögð: Skipulags- og byggingarnefnd samþykkir að texti kaflans verði eftirfarandi: „Skúrarnir þrír vitna um gamla tíma og eru mikilvægur hluti af landslagi og bæjarmynd hafnarsvæðisins. Samkvæmt gildandi deiliskipulagi er heimilt að fjarlægja þá og byggja á lóðinni (lóð 1 skv. deiliskipulagi) 3 lítil hús, hæð og ris."

6.3.  Í kafla 25.8.3 um tækifæri á reit 3.08 verði felld út setning um staðsetningu Garðarshólms á efri hæð verbúðarhúsnæðis.

Viðbrögð: 

Skipulags- og byggingarnefnd samþykkir að umfjöllun um reit 3.08 og reit 3.10 verði sameinuð undir heitinu „Verbúðir (3.08)" og verði eftirfarandi: „Verbúðirnar eru mikilvægar fyrir áframhaldandi smábátaútgerð og líf á svæðinu. Þær segja einnig sögu svæðisins og skapa því sérkenni þar sem ekki er að finna sambærilega byggingu á landinu, þ.e. tveggja hæða verbúðir. Þó svo allar verbúðirnar séu ekki nýttar fyrir smábátaútgerð í dag er mikilvægt varðveita a.m.k. þær sem eru á fyrstu hæðinni sem slíkar vegna góðra tengsla þeirra við Helguskúr (sjá 3.09) og til að viðhalda upplifun á útgerðarstarfsemi á svæðinu. Með því að fjarlægja Flókahús mætti flytja frystana norðan við Helguskúr en þeir takmarka aðgengi meðfram Verbúðunum.

Við endurskoðun deiliskipulags á svæðinu gæti komið til greina að nýta efri hæð Verbúðanna fyrir aðra starfsemi, en nauðsynlegar breytingar sem gera þarf á húsinu vegna þess skapa tækifæri til að bæta tengslin á milli stallanna í bakkanum með því að taka nyrstu verbúðirnar á fyrstu og annari hæð undir inngang. Þar væri hægt að koma fyrir lyftu og stiga sem nær frá Hafnarstéttinni upp á bakkann við Garðarsbraut. Inngangur á verbúðarþakinu myndi vera nógu fjarri kirkjunni til að áhrif hans á ásýnd kirkju væru óveruleg. Einnig væri hægt að koma fyrir inngangi á norðurgafli Verbúðanna, af stallinum þar sem Skuld stendur og beint inn á 2. hæð verbúðanna.  Einnig væri hægt að setja gegnsætt handrið efst á bygginguna í stað þess steypta handriðs sem er í dag. Það myndi bæði bæta útsýni yfir hafnarsvæðið séð frá Garðarsbraut og útsýnið af hafnarsvæðinu upp að bænum."  Fella þarf niður samsvarandi tilvísun í Garðarshólmaverkefnið í umfjöllun um svæði 2.09 í kafla 25.

7.  Oddný E. Magnúsdóttir, bréf dags. 1.7.2010.

7.1.  Oddný telur að tafarlaust verði að grípa til úrræða til að stemma stigu við útbreiðslu lúpínu í Húsavíkurlandi enda sé náttúrleg fjölbreytni gróðurs (sbr. verndun líffræðilegrar fjölbreytni) og fuglalífs í hættu að hennar mati.

Viðbrögð: Í aðalskipulagstillögunni eru afmörkuð svæði sem teljast verðmæt sökum líffræðilegrar fjölbreytni og sett fram stefna um verndun þeirra. Í aðalskipulagstillögunni eru einnig settar fram almennar áherslur fyrir landgræðslu og gert ráð fyrir að unnar verði landgræðsluáætlanir fyrir hvert svæði af hálfu þeirra sem að landgræðslunni standa. Ekki eru taldar forsendur til að setja fram nánari stefnu um landgræðslu eða stefnu um upprætingu lúpínu á tilteknum stöðum þar sem slík stefna er af meiri nákvæmni en aðalskipulaginu er ætlað að vera og að slíka stefnu verður að móta í samvinnu sveitarfélags og Landgræðslunnar og annarra þeirra sem að málinu eiga aðild.

Hilmar Dúi fulltúi V-listans í Skipulags-& byggingarnefnd telur að það mætti grípa til verndunaraðgerða í ákveðnum berjalöndum t.d. í Skjólbrekkunni.

8.  Alcoa, bréf dags. 29.7.2010.

8.1.  Óskað er eftir að norðurmörk iðnaðarsvæðis á Bakka verði færð til samræmis við nýlega staðfesta breytingu á aðalskipulagi Húsavíkurbæjar þannig að norðurmörk iðnaðarsvæðis fylgi sveitarfélagamörkum.

Viðbrögð: Fallist er á beiðnina þar sem hún er í samræmi við gildandi aðalskipulag.

8.2.  Alcoa óskar eftir að suðurmörk iðnaðarsvæðis verði færð 100 m til suðurs og svæðið stækkað sem því nemur.  Rökstuðningur liggur í því að samkvæmt nýjustu útreikningum á dreifingu útblásturs.  Samsvarandi breytingar yrði að gera á texta umhverfisskýrslu (bls. 33) og uppfæra stærð svæðis í kafla 24.3.10 bls. 18 um skipulag þéttbýlis svo og aðrar teikningar af iðnaðarsvæðinu sem kunna að vera í tillögunni.

Viðbrögð: Fallist er á stækkun iðnaðarsvæðis 100 m til suðurs þannig að það nái til áætlaðs þynningarsvæðis á landi, sbr. einnig frummatskýrslu um álver á Bakka. Samkvæmt leiðbeiningum frá Skipulagsstofnun verða mörk þynningarsvæðis út í sjó einnig færð inn á aðalskipulagsuppdrátt, sbr. mörk sem sett eru fram í frummatsskýrslu.

Hilmar Dúi fulltrúi V-listans í Skipulags- & byggingarnefnd hefur oft nefnt það á fundum að hann efist stórlega um endanlega stærð títtnefnds þynningarsvæðis áætlaðs álvers á Bakka.

8.3.  Lagt til að í kafla 7.1 um meginforsendur verði orðalagi breytt til þess að vera „reist verði allt að 346.000 tonna álver..."

Viðbrögð: Meirihluti skipulags- og byggingarnefndar fellst á orðalagsbreytinguna, sbr. einnig upplýsingar framkvæmdaaðila í  frummatsskýrslu um álver á Bakka.

Hilmar Dúi fulltrúi V-listans í Skipulags-& byggingarnefnd setur sig upp á móti orðalagsbreytingunni og gerir það að tillögu sinni að orðalaginu verði breytt í; "verði allt að 180 þúsund tonna álver". 

Meirihluti skipulags- og byggingarnefndar fagnar áhuga Hilmars á álveri, en heldur sig engu að síður við fyrrgreind stærðarviðmið um allt að 346.000 tonna álver.

8.4.  Lagt til að í kafla 7.1. verði orðalagi breytt til að vera „Gert verði ráð fyrir súrálssílóum og löndunarbúnaði við Húsavíkurhöfn".

Viðbrögð:  Fallist er orðalagsbreytinguna enda liggur nú fyrir að sílóin verða tvö, sbr. frummatsskýrslu um álver á Bakka.

8.5.  Lagt til að orðalag í kafla 6.12 bls. 32 í umhverfisskýrslu verði breytt þannig að skýrara sé að um tvær línur er að ræða og að aðeins önnur fer um Þeistareyki.

Viðbrögð: Fallist er á orðalagsbreytinguna þannig að ekki fari á milli mála að línurnar eru tvær.

8.6.  Bent er á nýjar upplýsingar í frummatsskýrslu vegna álvers vegna orðalags á bls. 31-34 í kafla 6 í umhverfisskýrslu.

Viðbrögð: Upplýsingarnar verða uppfærðar til samræmis við ný gögn.

9.  Landsnet, bréf dags. 21.6.2010.

9.1.  Vakin er athygli á að ljósleiðari Landsnets er ekki sýndur á uppdrætti.

Viðbrögð: Ljósleiðarinn verður settur inn á aðalskipulagsuppdrátt og gerð grein fyrir honum í kafla 23.22.4 í aðalskipulagsgreinargerð.

9.2.  Uppfæra þarf kafla 23.22.1 og 24.3.16 miðað við breytta stöðu á frummatsskýrslu vegna línulagna.

Viðbrögð: Texti í ofangreindum köflum verður lagfærður.

9.3.  Lagfæra þyrfti orðalag um Kópaskerslínu og línu að Lindarbrekku.

Viðbrögð: Textinn verður lagfærður.

9.4.  Vakin er athygli á því að aðveitustöðin í Skógargerðismel er í sameign Orkuveitu Húsavíkur og Landsnets.

Viðbrögð: Textinn verður lagfærður.

10.  Heilbrigðiseftirlit Norðurlands Eystra, bréf dags. 29.6.2010.

10.1.  Vegna skilgreindra efnistökusvæða innan vatnsverndarsvæða við Húsavík, vekur Heilbrigðiseftirlitið athygli á mikilvægi þess að öll umferð, umgengni og ástand tækja og vélbúnaðar á vatnsverndarsvæðum vatnsbóla verði eins og best verði á kosið.  Notkun hættulegra efna og birgðageymsla slíkra efna er bönnuð.  Jafnframt er vakin á því athygli að HNE veitir starfsleyfi fyrir framkvæmdum á vatnsverndarsvæðum innan Norðurþings.

Viðbrögð: Við veitingu framkvæmdaleyfis fyrir efnistöku innan skilgreindra vatnsverndarsvæða verður leitað álits Heilbrigðiseftirlits. Setningu um það og um að starfsleyfi þurfi vegna framkvæmda eða starfsemi innan vatnsverndarsvæða verður bætt inn í kafla 20.4 um nýtingu jarðefna og í kafla um skipulagsákvæði fyrir efnistökusvæði og vatnsverndarsvæði í dreifbýli og þéttbýli.

10.2.  Nauðsynlegt er að sveitarstjórn og heilbrigðiseftirlit setji sér langtímamarkmið um ástand strandsvæðis í samræmi við ákvæði reglugerðar nr. 796/1999 um varnir gegn mengun vatns.  Ekki liggur fyrir flokkun sjávar í Skjálfanda sem viðtaka fyrir skólp.

Viðbrögð: Tekið er undir þetta.

10.3.  Nauðsynlegt er að fullvinna svæðisáætlun um meðhöndlun úrgangs.

Viðbrögð: Tekið er undir þetta.

10.4.  Minnt er á að auk yfirlits yfir gamla urðunarstaði þurfi einnig að afla upplýsinga um hugsanlega staði þar sem hræ af skepnum sem drepist hafi úr miltisbrandi hafi verið urðuð.

Viðbrögð: Texta í kafla 12.7 verður breytt þannig að hann taki til sláturúrgangs og förgunar á sýktu fé eða öðrum skepnum, án þess að tilgreina riðu eða miltisbrand.

10.5.  Minnt er á að starfsleyfi þarf fyrir efnistöku, sbr. reglugerð nr. 785/1999 um starfsleyfi fyrir atvinnurekstur sem getur haft í för með sér mengun.

Viðbrögð: Í kafla 20.4 um jarðefni kemur fram að auk framkvæmdaleyfis þurfi framkvæmdaaðili að óska eftir leyfi annarra aðila eftir atvikum. Starfsleyfi verður sett inn sem dæmi.

11.  Landssamband hestamanna, bréf dags. 28.6.2010.

11.1.  Ekki kemur fram hvernig reiðleiðir austan og vestan Jökulsár á Fjöllum tengjast.

Viðbrögð:  Lega reiðleiða í auglýstri aðalskipulagstillögu er í samræmi við útgefið kort Atvinnuþróunarfélags Þingeyinga, „Útivist og afþreying", sbr. heimildaskrá aðalskipulagstillögunnar. Ekki lágu fyrir kortaupplýsingar um sérstakar reiðleiðir sem þvera Jökulsá. Skipulags- og byggingarnefnd leggur til að ekki verði gerðar breytingar á aðalskipulagstillögunni vegna ábendingarinnar að svo stöddu, en leggur til að reiðleiðir verði nánar kortlagðar í kjölfar aðalskipulagsins í samráði við landeigendur og aðra hagsmunaaðila.

11.2.  Ekki er sýnd reiðleið með Jökulsá á á Fjöllum eins og fram kemur á skýringaruppdrætti með tillögu að verndaráætlun Vatnajökulsþjóðgarðs.

Viðbrögð: Reiðleiðin verður færð inn enda er hún stofnleið frá Kelduhverfi/þjóðgarði upp í Mývatnssveit og hefur fengið kynningu og málsmeðferð skv. lögum um Vatnajökulsþjóðagarð.

11.3  Tilgreindar eru aðrar þekktar reiðleiðir sem ekki er getið í tillögunni.

Viðbrögð: Aðalskipulagi er ætlað að taka fyrst og fremst til stofnreiðleiða, s.s. þeirra sem liggja þvert eða langsum yfir sveitarfélagið eða á milli helstu svæða þess. Um aðrar reiðleiðir skal fjallað í deiliskipulagi.

12.  Siglingastofnun, bréf dags. 28.6.2010.

12.1.  Gera þarf grein fyrir sjóvarnargörðum í aðalskipulaginu.

Viðbrögð:  Sjóvarnargarðar eru ekki merktir sérstaklega á uppdráttum þar sem ekki liggja alltaf fyrir nákvæm gögn um legu þeirra og mörk og aðalskipulagið er í það smáum mælikvarða að betra fer á að afmarka þá í deiliskipulagi. Í aðalskipulagstillögunni kemur hinsvegar skýrt fram að heimilt er að reisa varnir vegna ágangs sjávar á grundvelli framkvæmdaleyfis og tilheyrandi gagna, þar sem talin er þörf á að verja mannvirki og vegi.

12.2.  Bent er á að hafnarsvæði Húsavíkurhafnar H2 og H3 er aðskilið.

Viðbrögð: Skipulags- og byggingarnefnd fellst á að tengja saman hafnarsvæði H2 og H3 um Naustafjöru.

13.  Dagbjartur Bogi Ingimundarson, bréf dags. 18.3.2010.

13.1.  Bogi mótmælir því að reiðvegur sé sýndur um land Brekku í Núpasveit án samráðs við landeigendur.

Viðbrögð: Lega reiðleiða í auglýstri aðalskipulagstillögu er í samræmi við útgefið kort Atvinnuþróunarfélags Þingeyinga, „Útivist og afþreying", sbr. heimildasrá aðalskipulagstillögunnar. Reiðleiðin verður hinsvegar tekin út af aðalskipulagsuppdrættinum þar sem hún er í óþökk landeigenda.

14.  GB5 ehf, bréf dags. 23.6.2010, þ.m.t. greinargerð Árna Árnasonar dags. 25.6.2010 og bréf Ágústs Hafsteinssonar dags. 29.6.2010.

14.1.  Óskað er eftir að haldið sé opnum þeim möguleika að þróa áfram aðstöðu fyrir verslun og þekkingarstarfsemi í bland við íbúðir að Garðarsbraut 3-5 með viðbyggingum, m.a. yfir á óbyggt svæði á Vallholtsvegi 1 (áður Garðarsbraut 3) með lokun Vallholtsvegar milli Garðarsbrautar og Ketilsbrautar. Vísað er í mikilvægi þess að skapa klasa verslunar og þjónustu í aðlaðandi umhverfi í hjarta bæjarins.

Viðbrögð: Stefnu aðalskipulagstillögunnar um miðbæinn er ætlað að tryggja heildarmynd og ákveðnar megináherslur sem unnið verði eftir við deiliskipulagsgerð. Lögð er áhersla á að halda Vallholtsvegi að Garðarsbraut opnum til að tryggja tengingu verslana við Vallholtsveg við aðalgötu bæjarins en þar er gerð ráð fyrir auknu verslunarrými. Einnig er lögð áhersla á að halda opinni sjónlínu milli hafnar og fjallshlíðar eftir Stóragarði og Vallholtsvegi. Þannig er tryggt að þeir sem fara um Garðarsbraut/Héðinsbraut eigi kost á að sjá upp í efri hluta miðbæjarins og að þjónusta þar verði sýnilegri.

Í aðalskipulagstillögunni er gert ráð fyrir auknu byggingarmagni á reit gamla Kaupfélagsins, sbr. kafla 25.6.1 og 25.6.2. Hvar og hvernig sú bygging verður innan reitsins er deiliskipulagsatriði. Þannig er sú staðsetning á mögulegum matvörkumarkaði innan reitsins sem sýnd er á skýringaruppdrætti á bls. 56 og 59 í auglýstri tillögu, leiðbeinandi en ekki bindandi, sbr. umfjöllun um tækifæri í kafla 25.6.3. Viðbótarbyggingar geta því allt eins verið á norðurhluta reitsins í beinum tengslum við gamla Kaupfélagið. Það verður ákveðið við gerð deiliskipulags.

14.2.  Furðu er talið sæta að ekki hafi verið metið vert fundar og frumkvæðis af hálfu sveitarfélagsins að hlýða á hugmyndir um mótun miðbæjar og vinna áfram möguleika og hugmyndir. Að móta miðbæjarklasa geri enginn einn aðili, sveitarfélagið verði að vera þar einn megin gerandi, með bæði mótun ramma og ekki síður með stefnumótun að beina starfsemi í miðbæ til styrkingar.

Viðbrögð: Sú vinna sem Noðurþing hefur lagt í mótun þess skipulagsramma sem birtist í aðalskipulagstillögunni endurspeglar vilja sveitarfélagsins til að þróa sterkan og lifandi miðbæ. Við undirbúining stefnunnar og skipulagsrammans voru skipulagseinkenni miðbæjarins fyrst greind og leitað eftir hugmyndum frá íbúum á opnum íbúafundi og rætt við hagsmunaaðila á svæðinu. Skipulagsráðgjafar unnu síðan úr þeim upplýsingum og þróuðu sínar hugmyndir sem fengu umfjöllun í skipulags- og byggingarnefnd og sveitarstjórn. Tillagan var kynnt á vef sveitarfélagsins í desember 2008 (þar sem hún hefur síðan verið til sýnis) og gafst íbúum og öðrum hagsmunaaðilum kostur á að senda inn athugasemdir. Engar athugasemdir bárust fram að auglýsingu aðalskipulagstillögunnar.

Það er vilji skipulags- og byggingarnefndar að þróa hugmyndir um skipulag miðbæjarins áfram við deiliskipulagsgerð í samstarfi við hagsmunaaðila og á þeim grunni sem aðalskipulagið setur. Sá grunnur eru þau markmið fyrir miðbæjarsvæðið í heild sem lýst er í kafla 25.4 og þau markmið sem sett eru fyrir hverja skipulagseiningu miðbæjarins í köflum 25.6 - 25.12. Þem undirköflum sem fjalla um tækifæri innan hverrar skipulagseiningar er ætlað að vera leiðbeinandi við deiliskipulagsgerðina.

14.3.  Gerð er athugasemd við orðalag um byggingarlist gamla Kaupfélagsins.

Viðbrögð:  Tekið er undir að orðalagið er óheppilegt og óviðeigandi og verður það lagfært. 

15.  Míla, bréf dags. 14.6. og 11.8.2010.

15.1.  Óskað er eftir því að fyrirhuguð ljósleiðaralögn við þjóðveg nr. 1 á Hólsfjöllum verði færð inn á aðalskipulag.

Viðbrögð: Fallist er á beiðnina enda eru áhrifin á umhverfi talin verða óveruleg. Við framkvæmdaleyfisveitingu verður gengið úr skugga um að leyfi landeigenda og umsagnir viðeigandi aðila liggi fyrir.

16.  Halldór Valdimarsson, bréf dags. 6.7.2010.

16.1.  Hefja ber sem fyrst skipulega eyðingu lúpínu á þeim svæðum í Húsavíkurlandi þar sem einsleitar lúpínubreiður eru að leggja undir sig stór gróin svæði, þ.m.t. berjalönd og breyta ásýnd og fuglalífi.

Viðbrögð: Sjá svar við 7. lið að ofan.

16.2.  Nýtt svæði fyrir hestamenn ætti frekar að vera á túnum austan þjóðvegar, norðan við núverandi hesthús og íbúðarhús í Saltvík. Þannig myndast heildrænt hverfi hestamanna. Einnig ætti að bjóða upp á að byggð séu nokkur íbúðarhús með hesthúsi innan lóðar á túnunum norðan við Saltvík í tengslum við uppbyggingu hesthúsahverfis.

Viðbrögð: Við val á nýju svæði undir hesthúsahverfis voru nokkur svæði í landi Saltvíkur til skoðunar, m.a. það svæði sem Halldór leggur til.  Niðurstaða meirihluta skipulags- og byggingarnefndar og sveitarstjórnar var sú að hagkvæmast væri að byggja þar sem aðalskipulagstillagan sýnir.  Það land er mjög hagkvæmt til uppbyggingar, flatt með grunnum lausum jarðlögum á móhellugrunni auk þess sem svæðið er talið snjóléttara en svæði austan þjóðvegar.

17.  Skipulagsstofnun.

Ítrekaðar eru athugasemdir við umhverfisskýrslu sem komu fram í umsögn Skipulagsstofnunar um aðalskipulagstillöguna dags. 14.4.2010.

Vísað er til svara í fylgiskjali með fundargerð skipulags- og byggingarnefndar frá 26.4.1010. Vegna mistaka fékk Skipulagsstofnun það skjal ekki í hendur með auglýstri tillögu og umhverfisskýrslu en þar koma fram eftirfarandi svör við athugasemdum Skipulagsstofnunar varðandi umhverfisskýrsluna og eru þau ítrekuð með nokkrum viðbótarútskýringum:

17.1.  Samræma þarf umfjöllun um áhrif tillögunnar í texta og einkunnagjöf í töflum.

Viðbrögð:  Eftir umsögn Skipulagsstofnunar dags. 26.4.2010 og fyrir auglýsingu aðalskipulagstillögunnar var umhverfisskýrslan yfirfarin með tilliti til þessa og lagfæringar gerðar þar sem ástæða þótti til, en ekki er fallist á að ósamræmi sé á milli þess að áhrif fái einkunnina „nokkuð neikvæð" og að þau teljist óveruleg.

17. 2.  Setja þarf fram vöktunaráætlun og/eða fjalla um mótvægisaðgerðir vegna neikvæðra áhrifum, t.d. vegna skerðingar á votlendi og gróðri/jarðvegi vegna iðnaðarsvæðis á Bakka. Gera þarf grein fyrir óvissu um áhrif og vísa mati á annað skipulagsstig eða í mat á umhverfisáhrifum.

Viðbrögð:  Minnt er á að stefna um álver á Bakka og tilheyrandi framkvæmdir hefur nýlega verið staðfest í aðalskipulagi af umhverfisráðherra, að undangenginni lögskyldri málsmeðferð, þ.m.t. umfjöllun Skipulagsstofnunar. Stefna í fyrirliggjandi aðalskipulagstillögu er alveg sambærileg við þá sem nýlega hefur verið staðfest. Að sama skapi er umfjöllun um umhverfisáhrif sú sama.

Skv. 9. gr. laga um umhverfismat áætlana skal í umhverfismati áætlunar gera grein fyrir hvernig „hagað skuli vöktun vegna líklegra verulegra umhverfisáhrifa af framkvæmd áætlunar komi hún eða einstakir þættir hennar til framkvæmda".  Í umhverfismati aðalskipulagstillögunnar voru áhrifin ekki talin veruleg en í umhverfisskýrslu er nánara mati vísað til mats á umhverfisáhrifum framkvæmdanna, sbr. bls. 32 þar sem segir: „Gerð verður nánari grein fyrir útfærslu framkvæmda og áhrifum þeirra í deiliskipulagi iðnaðarlóðar og við mat á umhverfisáhrifum framkvæmdanna, sbr. tillögu að matsáætlun fyrir álver (HRV Engineering 2008)  og tillögu að sameiginlegu mati á umhverfisáhrifum álvers á Bakka, Þeistareykjavirkjunar, Kröfluvirkjun II og háspennulína frá Kröflu og Þeistareykjum að Bakka (Mannvit 9a)." Á sama tíma og aðalskipulagstillagan var auglýst voru frummatsskýrslur vegna ofangreindra framkvæmda kynntar þar sem hægt var að kynna sér nánar umhverfisáhrif þeirra.

Hilmar Dúi fulltrúi V-listans í Skipulags-& byggingarnefnd tekur undir þessa athugasemd frá skipulagsstofnun og saknar þess að sjá ekki lista yfir mótvægisaðgerðirnar t.d. hvað skal gera með endurheimt á votlendinu sem að fer undir iðnaðarlóðina á Bakka. Í öllu þessu skipulagsferli hefur aldrei verið minnst á mótvægisaðgerðir við eyðingu votlendis.

17.3.  Gera þarf grein fyrir hvernig umhverfisviðmið eru notuð við mat á vægi áhrifa.

Viðbrögð:  Við einkunnagjöf var farið yfir umhverfisviðmið sem listuð eru í umhverfisskýrslunni og lagt huglægt mat á að hve miklu leyti viðkomandi stefnumið stangaðist á eða samræmdist viðkomandi umhverfisviðmiðum. Í texta er dregið fram ef stefnumið er talið stangast á við tiltekið umhverfisviðmið.

17.4.  Greina þarf frá tengslum tillögunnar við gildandi skipulagsáætlanir í sveitarfélaginu.

Viðbrögð:  Í forsendudálki í landnotkunartöflum skipulagsgreinargerðar er gerð grein fyrir ef skilgreining landnotkunar skv. tillögunni felur í sér breytingar frá gildandi aðalskipulagi.

17.5.  Greina þarf frá tengslum tillögunnar við aðalskipulag eða aðalskipulagstillögur aðliggjandi sveitarfélaga.

Viðbrögð:  Eftir umsögn Skipulagsstofnunar dags. 26.4.2010 og fyrir auglýsingu aðalskipulagstillögunnar var bætt inn texta um þær aðalskipulagsáætlanir sem eru í gildi og aðalskipulagstillögur sem eru í vinnslu og gerð verður grein við samræmi við þær. Landnotkun á sveitarfélagamörkum er að mestu leyti óbyggt svæði nema í Reykjahverfi þar sem er landbúnaðarsvæði. Vatnsverndarsvæði ná að sveitarfélagamörkum við Þingeyjarsveit og Skútustaðahrepp og hafa þau verið fest áður ýmist í aðalskipulagi, lögum um Mývatn og Laxá eða samþykkt heilbrigðisnefndar um vatnsverndarsvæði. Aðliggjandi sveitarfélög hafa fengið tillöguna til umsagnar og hafa ekki gert athugasemdir við landnotkun á sveitarfélagamörkum.

17.6.  Áhrif af stefnumiðum tillögunnar þarf að bera saman áhrif af núverandi aðalskipulagi (þar sem það er í gildi) auk samanburðar við núverandi ástand. Rökstyðja þarf af hverju tillagan er aðeins borin saman við 0-kost, þ.e. núverandi ástand.

Viðbrögð:  Aðalskipulag er í gildi í fyrrum Húsavíkurbæ, Kelduneshreppi, Kópaskeri og Raufarhöfn. Í flestum tilvikum tekur aðalskipulagstillagan gildandi stefnu upp óbreytta þannig að samanburður við gildandi aðalskipulag væri til lítils, þar sem um samskonar stefnu er að ræða. Það á t.d. við um álver á Bakka sem Skipulagsstofnun nefnir sem dæmi um stefnu sem ástæða sé til að bera saman við gildandi aðalskipulag. Einnig er minnt á að umhverfismat skal fyrst og fremst fjalla um þau stefnumið sem kunna að valda verulegum umhverfisáhrifum. Í umhverfisskýrslunni er hinsvegar fjallað um öll stefnumið tillögunnar og því gengið lengra en lögin krefjast.  Ef farið er fram á kerfisbundin samanburð við gildandi aðalskipulag er óskað eftir upplýsingum um við hvaða stefnumið það á, m.v. ákvæði laganna um að umhverfisskýrsla lýsi „þeim umhverfisþáttum sem líklegt er að verði fyrir verulegum áhrifum af framkvæmd áætlunarinnar" og setji fram skilgreiningu, lýsingu og mat „á líklegum verulegum umhverfisáhrifum af framkvæmd áætlunarinnar" (sbr. 6. gr. laga um umhverfismat áætlana).

17.7.  Tímasetja þarf markmið um ástandsflokkun yfirborðsvatns og ástæða gæti verið til að setja fram vöktunaráætlun.

Viðbrögð:  Aðalskipulagstillagan er ekki sett fram sem framkvæmdaáætlun og því eru markmið ekki tímasett. Flokkun vatns er á könnu Heilbrigðiseftirlits og mun Norðurþing hvetja til að flokkunin fari fram eins fljótt og hratt og hægt er. Varðandi vöktunaráætlun sjá fyrri svör um hana.

17.8.  Setja þarf fram vöktunaráætlun varðandi loftmengun í tengslum við stóriðju, sorpbrennslu og bílaumferð, sbr. stefnu um eftirlit með loftmengun sem fram kemur í kafla 19.2 aðalskipulagstillögu og í umhverfisskýrslu.

Viðbrögð:  Stefnan er sett fram til að fylgst verði með loftgæðum og brugðist verði við eftir því sem tilefni er til. Umhverfismat aðalskipulagstillögunnar hefur ekki leitt til þeirrar niðurstöðu að gera þurfi á þessu stigi sérstaka vöktunaráætlun á grundvelli laga um umhverfismat áæatlana. Vöktunaráætlun kann að þurfa að gera sem hluta af deiliskipulagi og einnig má vænta að sett verði fram vöktunaráætlun á grundvelli mats á umhverfisáhrifum álvers.

17.9.  Setja ætti fram vöktunaráætlun vegna hugsanlegra áhrifa útivistar við Botnsvatn og skíðasvæðis í Reyðarárhnjúk á vatnsverndarsvæði.

Viðbrögð:  Á þessu stigi eru áhrif af landnotkuninni ekki talin geta orðið veruleg og er því ekki tilefni til að setja fram vöktunaráætlun. Hinsvegar gæti á deiliskipulagsstigi, við nánara mat, verið talið tilefni til þess.

2.

201008056 - Sveinn Hreinsson f.h. Norðurþings, sækir um stöðuleyfi fyrir viðbyggingu við leikskólann Grænuvelli

Óskað er eftir stöðuleyfi til 10 ára fyrir bráðabirgðahúsnæði sem viðbyggingu við leikskólann við Iðavelli.  Meðfylgjandi umsókn eru teikningar unnar af Haraldi S. Árnasyni og skriflegt samþykki nágranna.

Meirihluti Skipulags- og byggingarnefndar leggur til við sveitarstjórn að veitt verði stöðuleyfi fyrir húsinu til 1. október 2020 enda skili umsækjandi skriflegu samþykki lóðarhafa.  Hilmar Dúi sat hjá við þessa afgreiðslu.

3.

201008068 - Sigurður R. Tryggvason sækir um framlengingu á stöðuleyfi fyrir viðbyggingu við fjárhúsin að Skinnastað

Óskað er eftir framlengingu stöðuleyfis fyrir viðbyggingu við fjárhús á Skinnastað.

Skipulags- og byggingarnefnd Norðurþings leggur til við sveitarstjórn að stöðuleyfi fyrir húsinu verði framlengt til 30. nóvember 2011.