Norðurþing rekur þrjá leikskóla, Grænuvelli á Húsavík, Krílabæ á Raufarhöfn og Krílakot á Kópaskeri og í Lundi.
Í leikskólunum eru nemendur á aldrinum tveggja til sex ára og er miðað við að öll börn komist í leikskóla að hausti á því ári sem þau verða tveggja ára. Skólarnir eru opnir frá kl. 7:45 - 17:15 og boðið er upp á 4 - 8,5 klst. dvalartíma. Leikskólarnir eru lokaðir í 4 daga á ári vegna skipulags- og námskeiðsdaga. Lokað er á aðfangadag og gamlársdag. Á sumrin er lokað vegna sumarleyfa í 20 daga (4 vikur).
Grænuvellir á Húsavík
Leikskólinn var opnaður í september 2007 þegar tveir eldri leikskólar voru sameinaðir, leikskólinn Bestibær og leikskólinn í Bjarnahúsi. Grænuvellir er sjö deilda leikskóli, deildirnar eru Árholt, Bali, Berg, Foss, Hóll, Tunga og Vilpa. Leikskólinn er opin frá 7:45 - 17:15.
Áherslur í starfi Grænuvalla er markviss málörvun og hreyfing. Einkunnarorð leikskólans eru hollusta, hamingja, heilbrigði.
Krílabær á Raufarhöfn
Leikskólinn Krílabær og Grunnskóli Raufarhafnar eru ein samrekin stofnun. Á leikskólanum er um 4 nemendur og í grunnskólanum eru 26 nemendur í 1. – 10. bekk. Samkennsla er á öllum stigum og einkennist starfið af sveigjanleika og samvinnu með vellíðan nemenda og starfsfólks að leiðarljósi. Lögð er áhersla á heilsusamlegan lífsstíl og markvissa íþróttaiðkun nemenda. Leikskólanemendur fá máltíðir í sameiginlegu mötuneyti skólanna. Deildarstjóri leikskóla er Olga Friðriksdóttir.
Krílakot á Kópaskeri og í Lundi
Öxarfjarðarskóli er samrekinn grunn- og leikskóli fyrir skólasamfélagið sem nær frá Kelduhverfi til Kópaskers. Tvær leikskóladeildir starfa innan skólans, önnur er staðsett á Kópaskeri en hin í Lundi þar sem grunnskólinn er til húsa.
Nemendur við Öxarfjarðarskóla eru nú 61, þar af 18 leikskólabörn í báðum deildum. Skóladagurinn í Lundi hefst kl. 8:20 og boðið er upp á lengda viðveru, þ.e. þrisvar í viku mánudaga - fimmtudaga stendur nemendum til boða að fá heimanámsaðstoð og sinna tómstundum á fjölbreyttum námskeiðum. Skólabílar aka börnunum í skólann og fara þeir frá Fjöllum og Kópaskeri kl. 7.45 á morgnana.
Leikskólinn á Kópaskeri er rekinn á heilsársgrunni og er opinn frá 8.00 til 16.00 alla virka daga. Börnin fá heitan mat í hádeginu frá Stórumörk þar sem félags- og þjónustumiðstöð eldri borgara starfar.
