Í Norðurþingi er öflugt íþróttastarf.
Íþróttafélagið Völsungur á Húsavík hefur innan sinna raða knattspyrnudeild, fimleikadeild, handknattleiksdeild, skíðadeild, bocciadeild, frjálsíþróttadeild, blakdeild og siglingadeild.
Ungmennafélagið Austri á Raufarhöfn heldur uppi fótbolta- og frjálsíþróttaæfingum allt árið um kring fyrir börn og unglinga á grunnskólaaldri. Jafnframt er boðið upp á leikjanámskeið fyrir börn 10 ára og yngri.
Golfklúbbur Húsavíkur telur u.þ.b. 150 félaga og af þeim eru um 40 krakkar. Golfklúbburinn heldur úti Katlavelli, sem er 9 holu golfvöllur og hafa mótin undanfarin ár verið rétt rúmlega 20 talsins og 5-7 mót af þeim opin mót.
Skákfélagið Goðinn stendur fyrir reglubundnum skákæfingum og skákmótum frá september til og með apríl ár hvert. Skákæfingarnar eru haldnar til skiptis á Húsavík og á Laugum í Þingeyjarsveit öll mánudagskvöld yfir vetrartímann. Skákmót félagsins eru haldin víðsvegar um Þingeyjarsýslur.
Skotfélag Húsavíkur var stofnað árið 1964 og var þá upphaflega skotveiðifélag. Í seinni tíð var félaginu breytt í skotfélag og samþykktum þess breytt í samræmi við það. Tilgangur þessara breytinga var að félagið yrði aðildarfélag að Héraðssambandi Þingeyinga (HSÞ). Allar götur síðan hefur félagið starfað undir merkjum ÍSÍ.
