Systkinaafsláttur í Skólamötuneytum Norðurþings

Rebekka Ásgeirsdóttir leggur til fyrir hönd S-lista að skoðað verði að koma á systkinaafslætti í skólamötuneytum Norðurþings. Rebekka vill að skoðað verði að koma á systkina afslætti í skólamötuneytum Norðurþings strax þegar skólar hefjast eftir sumarleyfi haustið 2022. Systkinaafslátturinn gildi þá einnig um mötuneyti leikskóla sem og nemendur Framhaldsskólans á Húsavík upp að 18 ára aldri sem nýta sér mötuneyti Borgarhólsskóla. Miðað verði við að afslátturinn verði 25% í upphafi, og í framhaldi af því áætlun sett fram um árlega hækkun út kjörtímabilið þar til sama afslætti verði komið á og tíðkast á gjöldum fyrir leikskólavist og vistun í frístund,þ.e. 50% fyrir 2. barn og 100% fyrir 3. barn. Í dag er afsláttur veittur milli frístundar og leikskóla og finnst undirritaðri að eðlilegt sé að sami háttur verði á í mötuneytum skólanna. Þessi tillaga er ætluð sem liður í að gera sveitarfélagið fjölskylduvænna og kjarabót til fjölskyldna.

Í ljósi þessa leggur Rebekka til fyrir hönd S lista að starfsmanni fjölskylduráðs verði falið að reikna út kostnað við þessa tillögu og bera undir ráðið að nýju.

Fræðslufulltrúi leggur fyrir ráðið útreikninga á kostnaði vegna systkinaafsláttar í skólamötuneytum Norðurþings.
Gera má ráð fyrir að tekjur skerðist um tæpar 4 milljónir ef systkinaafsláttur verði 25% en um tæpar 10 milljónir verði systkinaafsláttur 50% fyrir annað systkini og 100% fyrir þriðja systkini eða fleiri.