Norðurþing efnir til nafnasamkeppni

Norðurþing efnir til nafnasamkeppni og óskar eftir hugmyndum að nafni á nýju frístunda- og félagsmiðstöðvarhúsi á Húsavík sem og nafni á frístundarstarfið.

Framkvæmdir við nýtt húsnæði frístundar- og félagsmiðstöðvar við Borgarhólsskóla miðar vel áfram og stefnt er að því að húsnæðið verði tekið í notkun í október.

Af því tilefni leitum við til íbúa eftir hugmyndum að nöfnum. Gaman væri ef tillögur myndu fanga anda starfseminnar og endurspegla það lifandi samfélag sem þar mun dafna.

• Annars vegar er óskað eftir tillögum að nafni á nýju húsi sem mun meðal annars hýsa frístund og félagsmiðstöð.
• Hins vegar er óskað eftir tillögum að nafni fyrir starfsemi frístundar.

Við hvetjum börn, ungmenni og fullorðna til að taka þátt og senda inn tillögur.
Nafnið á húsinu getur tengst sögu svæðisins, náttúru, menningu, samveru eða öðru sem einkennir Norðurþing eða starfið sjálft.

Hvernig sendi ég inn tillögu?

• Sendu inn eina eða fleiri hugmyndir að nafni í gegnum eftirfarandi hlekk;
  SENDA INN TILLÖGU
• Skrifaðu stutta skýringu með á hugmyndinni, af hverju þú valdir þetta nafn.
  Ekki skilyrði / má sleppa.

Val á nafni
Að loknum innsendingarfresti munu stjórnendur velferðarsviðs velja nokkur nöfn úr innsendum tillögum sem þykir henta nýju húsinu best sem síðan verður kosið um af nemendum Borgarhólsskóla og Framhaldsskólanum á Húsavík.

Við leggjum áherslu á skapandi hugmyndir sem höfða til barna og ungmenna og endurspegla tilgang og hlutverk hússins.

Við vonumst til að fá fjölbreyttar og skemmtilegar hugmyndir og bjóðum öllum að taka þátt í að móta samfélagið og velja nafn á þetta nýja samkomuhús fyrir unga íbúa Norðurþings.

Sendu inn þína tillögu og taktu þátt, hægt verður að senda inn tillögur til og með 5. oktbóber n.k.