Norðurþing og Völsungur undirrita nýjan þriggja ára samstarfssamning

Sveitarfélagið Norðurþing og Íþróttafélagið Völsungur hafa undirritað nýjan samstarfssamning til næstu þriggja ára sem tryggir áframhaldandi stuðning við öflugt íþróttastarf í sveitarfélaginu.

Samningurinn er liður í áframhaldandi og markvissu samstarfi Norðurþings og Völsungs, þar sem áhersla er lögð á að efla íþrótta- og æskulýðsstarf, stuðla að heilbrigðum lífsstíl og tryggja börnum og ungmennum aðgang að skipulögðu og faglegu íþróttastarfi.

Með samningnum skuldbindur Norðurþing sig til að veita Völsungi fjárhagslegan stuðning sem gerir félaginu kleift að halda úti fjölbreyttri starfsemi, bæta aðstöðu og styðja við þjálfara og sjálfboðaliða. Jafnframt er tryggt áframhaldandi aðgengi félagsins að íþróttamannvirkjum sveitarfélagsins til æfinga og keppni.

Aðilar samningsins leggja ríka áherslu á forvarnar- og lýðheilsuhlutverk íþrótta og mikilvægi þess að skapa jákvætt og uppbyggilegt umhverfi fyrir iðkendur á öllum aldri. Þriggja ára gildistími samningsins veitir Völsungi aukið öryggi til langtímaáætlana og uppbyggingar starfsins.

Þessi samningur er mikilvægur þáttur í stefnu Norðurþings um að efla lýðheilsu, félagslega þátttöku og velferð íbúa,“ segir Katrín Sigurjónsdóttir, sveitarstjóri Norðurþings. „Völsungur gegnir lykilhlutverki í samfélaginu og með þessum þriggja ára samningi erum við að tryggja stöðugleika og festu í öflugu íþróttastarfi sem skiptir miklu máli fyrir börn, ungmenni og fjölskyldur í sveitarfélaginu.“

„Það er mikil ánægja með undirritun nýs samnings við Norðurþing og að samningurinn sé til þriggja ára. Það auðveldar mikið í starfseminni til framtíðar að til staðar sé samningur til lengri tíma. Völsungur er öflugt félag sem litar bæjarfélagið á Húsavík alla daga ársins“ sagði Jónas Halldór Friðriksson framkvæmdastjóri Völsungs.