Húsavík hlýtur kaupstaðarréttindi 1.janúar 1950

Mynd Jón Jóhannesson
Mynd Jón Jóhannesson

Húsavíkurkauptún hlýtur kaupstaðarréttindi 1.janúar 1950.

 “Herra forseti. Það er vitanlega mjög heppilegt fyrir sveitarfélög almennt, ef lög verða samþ. þess efnis, að þau. megi ráða sér framkvæmdastjóra, því að oft er það bagalegt að þurfa að kjósa slíkan starfsmann sem oddvita, en þrátt fyrir það óska ég eindregið, að frv. þetta, sem nú er til umr., verði að lögum, því að margt er það fleira, sem gerir það eðlilegt, að þorp, sem hafa á annað þúsund íbúa, fái bæjarréttindi. Ýmis löggjöf er nú orðið einmitt miðuð við slíka skiptingu sveitarfélaga í bæi og hreppa eftir mannfjölda. Síðastl. ár fórum við Húsvíkingar t.d. þess á leit við hið opinbera að fá frá ríkinu þátttöku í lögreglumálum kauptúnsins, en var synjað. Hins vegar var látið í það skína, að ekki hefði verið hægt að færast undan þessu, ef Húsavík hefði haft kaupstaðarréttindi. Nefni ég þetta sem eitt dæmi þess, hve réttmætt það er, að svo fjölmenn kauptún sem Húsavík er fái bæjarréttindi.”

Svo mælti Karl Kristjánsson á Alþingi Íslendinga þann 23. nóvember 1949 er hann mælt fyrir frumvarpi til laga (27.mál)  um Bæjarstjórn í Húsavík.

Þann 1.janúar 1950 fékk Húsavíkurkauptún kaupstaðarréttindi og nafnið Húsavíkurkaupstaður. 

Sjá feril málsins á Alþingi

Fyrsta bæjarstjórn hins nýja kaupstaðar var kosin 29. Janúar 1950 og hana skipuðu:

Axel Benediktsson, skólastjóri. 
Helena Líndal, frú. 
Ingólfur Helgason, trésmíðameistari. 
Jóhann Hermannsson, sjómaður. 
Karl Kristjánsson, alþingismaður. 
Páll Kristjánsson, skrifstofumaður. 
Þórir Friðgeirsson, gjaldkeri.

 

Fyrsti bæjarstjórnarfundurinn var haldinn í Samkomhúsinu 31. janúar og segja heimildir að þéttskipað hafi verið í Samkomuhúsinu enda mikill áhugi fyrir þessu máli hjá bæjarbúum en fyrr um haustið var haldinn fjölmennur íbúafundur þar sem samþykkt var að leggja til við Alþingi að Húsavík fengi kaupstaðarréttindi.

Forseti bæjarstjórnar var kosinn Karl Kristjánsson. Varaforseti Axel Benediktsson. Karl Kristjánsson tók að sér bæjarstjórastarfið, samkvæmt ósk fundarins, „a. m. k. til 1. október n. k." 

Karl Kristjánsson - Sveitarstjórnarmál, 2.hefti (01.08. 1950)