Fræðslu- og menningarnefnd Norðurþings

Fræðslu- og menningarfulltrúi kynnti samantekt á rauntölum rekstrar vegna fyrstu sjö mánaða ársins ásamt áætlun ársins 2014 og fór yfir frávík á málaflokkum og deildum vegna sama tíma. Rekstur málaflokkanna í heild er í jafnvægi miðað við áætlun ársins, áhrif kjarasamninga kennara eru þó ekki komin fram í stöðunni en þau eru veruleg, einkum í Borgarhólsskóla. Einstaka deildir þarfnast frekari skoðunar og vinnur Fræðslu- og menningarfulltrúi að því í samvinnu við viðkomandi stjórnendur.

Fræðslu- og menningarfulltrúi kynnti samantekt á kostnaðarauka vegna samninga við leik- og grunnskólakennara frá s.l. vori.

Erindi frá ALLIR LESA lagt fram til kynningar. Verkefnið er nokkurs konar landsleikur í lestri og er unnið að frumkvæði Miðstöðvar íslenskra bókmennta og Reykjavík Bókmenntaborg UNESCO. Verkefnið stendur í mánuð frá 17. október og lýkur á Degi íslenskrar tungu þann 16. nóvember. Markmiðið er að auka lestur íslensku þjóðarinnar og fá fleiri til að njóta lesturs. Fyrirkomulagið er með svipuðum hætti og t.d. Hjólað í vinnuna. Þátttakendur skrá sig og lestur sinn á vefinn allirlesa.is. Fræðslu- og menningarnefnd hvetur íbúa og einkum skólafólk og nemendur í Norðurþingi til að kynna sér átakið og taka þátt.

Fulltrúar leikskólans Grænuvalla, Sigríður Valdís Sæbjörnsdóttir leikskólastjóri, Aðalbjörg Friðbjarnardóttir aðstoðarleikskólastjóri, Lilja Sigurðardóttir fulltrúi starfsmanna og Bergþóra Höskuldsdóttir fulltrúi foreldra mættu á fundinn. Fyrir nefndinni liggur ernidi frá Helenu Eydísi Ingólfsdóttur foreldri þar sem að bent er á að kastali á lóð leikskólans getur skapað hættu fyrir yngri börn. Fræðslu- og menningarnefnd þakkar ábendinguna. Kastalinn uppfyllir alla öryggisstaðla en hann er ekki ætlaður yngri börnum en þriggja ára. Til að bregðast við málinu er lagt til að skipta kastalanum út fyrir önnur leiktæki sem að til eru í bænum. Leikskólastjóra ásamt Fræðslu- og menningarfulltrúa falið að skoða mögulegar lausnir ásamt Tómstunda- og æskulýðsfulltrúa.

Samþykktir af sjötta aðalfundi FL varðandi símenntun og starfsþróun, fjölda barna í rými á leikskólum og námsleyfi leikskólakennara lagðar fram til kynningar. Fulltrúar leikskólans Grænuvalla viku af fundi kl. 08:45.