Skipulags- og byggingarnefnd Norðurþings

Skipulags- og byggingarfulltrúi kynnti tillögu að breytingu deiliskipulags 1. áfanga iðnaðarsvæðis á Bakka. Við deilihönnun vegtenginga við þjóðveg sem unnin hefur verið í samráði við Vegagerðina hefur komið í ljós að heppilegt væri að hnika til og breyta vegtengingum frá áður samþykktu deiliskipulagi. Tvær tengingar til vesturs hliðrist til norðurs vegna hæðarlegu lands, sú syðri um 28 m og sú nyrðri um 39 m. Áður var í deiliskipulagi 2. áfanga búið að festa nýja vegtengingu til austurs inn í götuna Tröllabakka skammt norðan Bakkaár og í samráði við Vegagerðina hefur því verið ákveðið að fella niður vegtengingu við þjóðveg vestur af lóð undir spennivirki. Við breyttar vegtengingar hliðrast skipulagsmörk lítillega (allt að 39 m) til norðurs og lóðarmörk lóða B1-B6 breytast nokkuð. Loks er gert ráð fyrir að tímabundið megi nýta lóðir B1-B4 undir vinnubúðir meðan á framkvæmdum stendur. Heimilt verði að vinnubúðir standi utan byggingarreita.

Skipulags- og byggingarnefnd telur umræddar breytingar frá samþykktu deiliskipulagi óverulegar og leggur því til við bæjarstjórn að farið verði með breytingarnar skv. 2. mgr. 43. gr. skipulagslaga. Eini nágranni sem kynni að hafa hagsmuni á svæðinu er lóðarhafi að Bakkavegi 2, en breytingartillagan hefur verið unnin í samráði og sátt við hann. Nefndin telur því ekki þörf á formlegri grenndarkynningu skipulagsbreytingarinnar sbr. ákvæði 3. mgr. 44. gr. skipulagslaga.

Skipulags- og byggingarnefnd leggur til við bæjarstjórn að skipulagstillagan verði samþykkt eins og hún lögð fram. Skipulags- og byggingarfulltrúa verði falið að senda breytinguna á Skipulagsstofnun og auglýsa gildistöku.

Skipulags- og byggingarfulltrúi kynnti tillögu sína að gæðahandbók fyrir byggingarfulltrúaembættið sem hann leggur til að tekin verði upp um áramót.

Skipulags- og byggingarnefnd leggur til við bæjarstjórn að gæðastjórnunarkerfi byggingarfulltrúa verði tekið upp um áramót. Byggingarfulltrúa verði falið að senda umsókn um skráningu kerfisins til Mannvirkjastofnunar.

Óskað er eftir tímabundnum afnotum lóðar austan þjóðvegar norðan Bakkaár undir vinnubúðir vegna jarðvegsframkvæmda á Bakka. Horft er til þess að nýta lóðina til ársloka 2015.

Skipulags- og byggingarnefnd Norðurþings leggur til við framkvæmda- og hafnanefnd og bæjarstjórn að Árna Helgasyni ehf verði boðin afnot af lóð sem merkt er F1 á deiliskipulagi 2. áfanga á Bakka.

Óskað er eftir samþykki fyrir útskiptum á vigtarskúr við höfnina á Raufarhöfn og stofnun lóðar undir skúrinn. Fyrir fundi liggur tillaga að hnitsettu lóðarblaði og teikningar af fyrirhuguðu húsi.

Skipulags- og byggingarnefnd leggur til við framkvæmda- og hafnarnefnd og bæjarstjórn að stofnuð verði lóð skv. tillögu að lóðarblaði.

Ennfremur verði skipulags- og byggingarfulltrúa heimilað að veita leyfi fyrir fyrirhuguðu húsi.

Óskað er eftir heimild sveitarfélagsins til að hanna nýbyggingar norður frá núverandi Kaupfélagshúsi norður yfir Vallholtsveg. Í þessu samhengi er vísað til kynningar á síðasta fundi skipulags- og byggingarnefndar og meðfylgjandi greinargerð sem rammar inn uppfærðar áherslur hugmyndarinnar. Forsenda fyrir hugmyndunum er að Vallholtsvegi verði lokaði norður af Garðarsbraut 5 og byggt yfir á Vallholtsveg 1.

Skipulags- og byggingarnefnd hugnast að hluta þær hugmyndir sem kynntar hafa verið og lýsir yfir vilja til samstarfs um þróun og útfærslu þeirra. Skipulags- og byggingarnefnd leggur til að formanni skipulagsnefndar, skipulagsfulltrúa og bæjarstjóra verði falið að ræða við eigendur Gb5 ehf um framhaldið.

Óskað er eftir leyfi til að endurnýja þakklæðningu og stækka dyr að Garðarsbraut 48.

Erindið var samþykkt af byggingarfulltrúa 24. nóvember s.l.

Fasteignafélag Húsavíkur hefur nú lagt fram nýjar og talsvert breyttar teikningar af fyrirhugaðri viðbyggingu við Vallholtsveg 9. Viðbygging er nú hugsuð á tveimur hæðum. Með teikningum fylgir uppfærð grenndarkynning.

Skipulags- og byggingarnefnd telur grenndarkynningu fullnægjandi og felur skipulags- og byggingarfulltrúa að samþykkja byggingarleyfi þegar fullnægjandi teikningar hafa borist. Örlygur Hnefill vék af fundi við afgeiðslu þessa erindis.

Óskað er eftir umsögn vegna gerðar bílastæðis sunnan eignar þeirra að Héðinsbraut 4.

Skipulags- og byggingarnefnd fellst fyrir sitt leiti á að bílstæði verði gert eins og rissmynd sýnir, en minnt er á að gerð bílastæðisins er háð samkomulagi við alla lóðarhafa.