Fréttir

Forvarnarhópur hefur verið stofnaður hjá Norðurþingi.  Markmið hópsins eru að stuðla að heilbrigðu líferni unglinga í okkar samfélagi og öruggu umhverfi.  Fulltrúar í hópnum eru Aðalsteinn Júlíusson lögregluvarðstjóri, Freydís Jóna Freysteinsdóttir félagsmálastjóri, Kristjana María Kristjánsdóttir umsjónarmaður félagsmiðstöðva, Sigríður Hauksdóttir félags-og forvarnarfulltrúi FSH, Sveinn Hreinsson æskulýðsfulltrúi og Þorgrímur Sigmundsson forvarnarfulltrúi.  Hópurinn fundar mánaðarlega.

Þeir sem hafa í hyggju að sækja um leiðbeinendastarf hjá Vinnuskóla Norðurþings,  sumarið 2008,  geri það fyrir 25. apríl. Um er að ræða tvö til þrjú störf á Húsavík, eitt starf á Kópaskeri og eitt á Raufarhöfn. Leiðbeinendastarfið er gefandi starf þar sem unnið er með ungu fólki.  Leiðbeinendur verða að hafa frumkvæði í vinnu og geta unnið sjálfstætt. 

Að fenginni tillögu menningar- og fræðslunefndar hefur sveitarstjórn Norðurþings samþykkt endurskoðun á reglum um innritun barna á leikskóla sveitarfélagsins. Með þessu eru reglurnar færðar til samræmis við það sem gerist í öðrum sveitarfélögum á þann veg að kennitala barns verður ráðandi við innritun fremur en dagsetning umsóknar. Reglur um inntöku barna á leikskóla Norðurþings

Eins og glöggir vegfarendur um þjóðveg 85, Norðausturveg, hafa eflaust tekið eftir er komið upplýsingaskilti rétt norðan við afleggjarann upp á Húsavíkurfjall.  Á þessu skilti sem Vegagerðin kom upp eru m.a. upplýsingar um vind og hitastig á Tjörnesi austanverðu, rétt sunnan Bangastaða. Þá er hægt að koma ýmsum öðrum upplýsingum til skila á skiltinu, t.a.m. styrk vindhviða og eins ef vegurinn er lokaður. Sams konar skilti var sett upp fyrir þá sem leið eiga vestur um og er það staðsett við Ásbyrgi.

Í tengslum við úthlutun Menningarráðs Eyþings á verkefnisstyrkjum verða Ragnheiður Jóna Ingimarsdóttir, menningarfulltrúi Eyþings, Erla Sigurðardóttir menningar- og fræðslufulltrúi Norðurþings og Elísabet Gunnarsdóttir aðstoðarmaður sveitarstjóra með kynningarfundi á  Húsavík, Kópaskeri og Raufarhöfn  dagana 20. og 21. Febrúar.  Sjá nánar um dagskrá

Menningarráð Eyþings auglýsir eftir umsóknum um styrki á grundvelli  samnings menntamálaráðuneytisins og samgönguráðuneytis við Eyþing frá 27. apríl 2007. Tilgangur styrkjanna er að efla menningarstarfsemi og menningartengda ferðaþjónustu á svæði Eyþings. Umsóknarfrestur er til og með 3. mars.  Úthlutun fer fram í apríl.

Deildarfundur Þingeyjardeildar KEA verður haldinn þriðjudaginn 19. feb kl.16:30 á veitingahúsinu Sölku á Húsavík Á fundinum verða venjuleg aðalfundarstörf samkvæmt samþykktum um störf deilda félagsins. Deildarstjórnin  

Útbúin hefur verið kortasjá fyrir Norðurþing og er hún aðgengileg um hnapp hér til hægri.  Í kortasjánni er hægt  að sjá loftmynd af öllu Norðurþingi og þysja sig inn á minni svæði.  Sérstakir flýtihnappar eru fyrir loftmyndir af þéttbýliskjörnunum á Húsavík, Kópaskeri og Raufarhöfn.  Hægt er að slá inn heiti fasteigna og á þá að birtast loftmynd af svæði umhverfis fasteignina.  Einnig er þar tenging á fasteignaskrá Fasteignamats ríkisins.  Kortasjáin er hugsuð sem frumútgáfa af landupplýsingakerfi fyrir Norðurþing.  Vænta má frekari þróunar á henni á næstu mánuðum.

Spennandi tækifæri í rekstri Sveitarfélagið Norðurþing auglýsir til leigu aðstöðu fyrir ferðaþjónustu að Lundi í Öxarfirði í Norður - Þingeyjarsýslu. Í Lundi er mötuneyti og heimavist sem hefur um árabil verið leigt út til ferðaþjónustu frá vori og fram á haust. Á staðnum er sundlaug og íþróttahús. Þegar liggur fyrir nokkuð af bókunum vegna komandi sumars.

Á fundi hafnanefndar Norðurþings í gær var fjallað um undirbúning að stóriðjuhöfn á Húsavík og kom þar fram að  Siglingastofnun hefur þegar hafið rannsóknir og vinnu við líkan af slíku mannvirki. Vinna Siglingastofnunar er jákvæð þróun í heildarvinnu við verkefnið um stóriðju á Bakka. Áætlað er að allar niðurstöður vegna stóriðjuhafnarinnar liggi fyrir á vordögum.

Eftirfarandi frétt birtist á mbl.is í dag: Bæjarráð Akureyrar lýsir yfir eindregnum stuðningi við áform um uppbyggingu álvers á Bakka við Húsavík, skv. bókun sem gerð var á fundi ráðsins í gærmorgun. Fjórir ráðsmenn samþykktu bókunina en fulltrúi VG sat hjá við afgreiðsluna. „Á undanförnum árum hefur alvarlegur samdráttur í fiskvinnslu og landbúnaði haft veruleg áhrif á afkomu fólks, atvinnuöryggi og búsetu á svæðinu. Á síðustu 10 árum hefur íbúum á svæðinu frá Húsavík til Raufarhafnar, sem nú heitir Norðurþing, fækkað um 15%. Mest hefur fækkunin verið í aldurshópnum 40 ára og yngri, en í þeim aldursflokki hefur íbúum fækkað um 25%.

Skíðaáhugafólk athugið! Á síðu 547 á textavarpi RUV verða settar inn upplýsingar um skíðamálin, bæði gönguskíði og vonandi síðar um brekkurnar í Skálamel og Stöllum á Húsavík. Reynt verður að uppfæra þessar upplýsingar reglulega.