Fréttir

Fjölbreytileikinn má ekki tapast Skipulagsmál á miðbæjar- og hafnarsvæði til skoðunar Sveitarstjórn Norðurþings fékk ráðgjafarfyrirtækið Alta til að greina stöðu og möguleika í skipulagi miðbæjar- og hafnarsvæðis á Húsavík og hófst sú vinna fyrr í mánuðinum.  Fyrsta skrefið fólst í fundum með ýmsum hagsmunaaðilum á svæðinu.  Fundað hefur verið með fulltrúum ferðaþjónustufyrirtækja, flutninga- og fiskvinnslufyrirtækjum, smábátasjómönnum, björgunarsveit og þjónustufyrirtækjum á miðbæjarsvæði næst hafnarsvæðinu, auk fundar með fulltrúum í hafnarstjórn, skipulags- og byggingarnefnd og umhverfis- og tækniráði Norðurþings. Smella hér til að sjá tilkynninguna í heild sinni

Í Kelduhverfi hefur verið stunduð kornrækt í nokkur ár.  Ekki er ræktunin í mjög stórum stíl en þó hafa þeir sem hana stundað hvorki fengið of litla né of mikla uppskeru.  Fimmtudaginn 26. apríl var svo sáð í akurinn, er hann um 2 hektarar og staðsettur á flötunum við Fjöll.  Í þetta sinnið var gerð tilraun með að nota dreifsáningu með kastdreifara í stað raðsáningar með sáningarvél Landgræðslunnar. Verður spennandi að sjá hvort einhver munur verður á árangri nú og á fyrri árum.  Allavega fer þetta vel af stað, rigningarskúri gerði sama dag rétt eins og pantað var.

Atvinnuþróunarfélag Þingeyinga endurútgefur ferðaþjónustubækling um Þingeyjarsýslur! Í fyrra gaf Atvinnuþróunarfélag Þingeyinga út veglegan 40 síðna ferðaþjónustubækling um Þingeyjarsýslur á ensku og íslensku í 20.000 eintökum.  Nú er svo komið að það upplag er að verða búið og hefur því verið tekin ákvörðun um að endurútgefa bæklinginn.   Á næstu dögum munu starfsmenn félagsins hafa samband við þá aðila sem voru með skráningu í bæklingnum og óska eftir áframhaldandi skráningu.

Í dag, 27. apríl 2007, var á Húsavík undirritaður samningur um samstarf menntamálaráðuneytis og samgönguráðuneytis við 16 sveitarfélög á Norðurlandi eystra um menningarmál og menningartengda ferðaþjónustu. Þorgerður Katrín Gunnarsdóttir menntamálaráðherra undirritaði samninginn f.h. ríkisins en Björn Ingimarsson, formaður sveitarfélaganna í Eyþingi, undirritaði samninginn fyrir hönd sveitarfélaganna. Er þetta í fyrsta sinn sem gengið er til slíks samstarfs við Norðurland eystra en áður hefur verið gengið til samstarfs við Austurland árið 2001 og Vesturland árið 2005 með sambærilegum hætti.  

Á síðasta fundi stjórnar Sorpsamlags Þingeyinga var ákveðið að fela stjórnarformanni, Jóni Helga Björnssyni  að skoða möguleika á samstarfi við Eyfirðinga um aukna endurvinnslu og endurnýtingu úrgangs. Hér er mjög áhugavert málefni á ferð sem að viðkemur öllum íbúum og umhverfi sveitarfélagsins.  Það er von að um þetta hljótist gott samstarf, enda er það liður í umhverfisstefnu sveitarfélagsins að koma þessum málum í góðan farveg.

Í sumar eru fyrirhugaðar 5 komur skemmtiferðaskipa til Húsavíkur. 8. og 18. júní kemur skipið National Geographic Endeavour sem er 89 metra langt og tekur 110 farþega.  Í áhöfn eru 65 manns. Endeavour mun dvelja stutt við og er í höfn þann 8. júní frá kl. 7:00 til 10:00 og þann 18. júní frá kl. 16:00 til 18:00

Á  fundi fjölskyldu- og þjónusturáðs Norðurþings þann 25. apríl 2007 var samþykkt að gjaldfrítt verði í sundlaugar sveitarfélagsins á Húsavík og Raufarhöfn, fyrir 16 ára og yngri. Hingað til hefur einungis verið gjaldfrítt fyrir íbúa sveitarfélagsins 16 ára og yngri en hér með verður gjaldfrítt fyrir alla einstaklinga á þeim aldri.  

Prestastefna var sett á Húsavík í gær 24. apríl. Biskupar, prestar og djáknar gengu skrúðbúnir frá Fosshótelinu á Húsavík að Húsavíkurkirkju í blíðskapar veðri.  Athöfn fór fram í Húsavíkurkirkju þar sem sr. Auður Eir Vilhjálmsdóttir predikaði.  Eftir athöfn í Húsavíkurkirkju var farið í Sjóminjasafnið þar sem sveitastjórn Norðurþings tók á móti þeim. Skoða myndir

Í gærkvöldi varð eldur laus í sorpmóttökustöð við Víðimóa á Húsavík. Ekki var mikill eldur en nokkuð tjón varð á rafbúnaði og lögnum. Slökkvistarf tók um 20 mínútur og var því lokið um klukkan 10:30. Búast má við rekstrarstöðvun um óákveðin tíma og er ekki tekið við úrgangi frá almenningi að sinni.

Hollvinasamtök FSH boðuðu til málþings í tilefni af  20 ára afmæli Framhaldsskólans á Húsavík . Málþingið fór fram í skólanum laugardaginn 21. apríl. Yfirskriftin er: FSH 20 ára og í takt við tíðarandann? Flutt voru 4-5 stutt erindi sem öll snérust á einhvern hátt um FSH og pallborðsumræður voru á eftir. Ýmsir tóku til máls eins og Bergur Elías Ágústsson sveitarstjóri Norðurþings og Soffía Helgadóttir fulltrúi útskrifaðra nemenda skólans. Fundarstjóri var  Guðmundur B. Þorkelsson skólameistari

Handboltamót var haldið í Íþróttahöllinni á Húsavík dagana 19. - 21. apríl.  Þetta mót var fyrir krakka í 5. flokki stúlkna og drengja. Mótið ber heitið Húsavíkurmótið og var það 17. skipti sem það er haldið.  220 krakkar í 27 liðum frá 9 félögum léku 71 handboltaleik frá kl:11 á sumardaginn fyrsta til rúmlega tvö á laugardag.  

Skíðamaðurinn Stefán Jón Sigurgeirsson frá Húsavík keppti á Skíðalandsmóti 2007 sem haldið var í Hlíðarfjalli daganna 13-15 apríl. Hann stóð sig frábærlega og var í nokkrum verðlaunasætum og var meðal annars íslandsmeistari í alpatvíkeppni 17 - 19 ára. Frábær árangur það.