Fréttir

Ljósin voru tendruð á jólatrénu á Húsavík nú undir kvöld og var fjölmenni viðstatt enda milt veður í bænum. Meðal þeirra sem létu sjá sig voru nokkrir jólasveinar sem komu ofan úr Dimmuborgum í Mývatnssveit til að syngja og dansa í kringum jólatréð með börnunum.  

Laugardaginn 2. desember næstkomandi verður markaðs- og menningardagur í íþróttahúsinu á Kópaskeri. Húsið opnar kl. 13:00 og hálftíma síðar eða kl. 13:30 verður dagurinn settur og Bergur Elías Ágústsson sveitarstjóri ávarpar gesti. Þess ber að geta að húsið opnar kl. 11:00 fyrir þátttakendur.

Framhaldsskólinn á Húsavík stóð fyrir fyrstu spurningakeppni grunnskólanna í Suður Þingeyjarsýslu s.l. föstudag. Borgarhólsskóli sendi tvö blönduð lið nemenda úr 8., 9. og 10. bekk. Lið A var skipað þeim Brynjari úr 8. bekk, Anítu úr 9. bekk og Sigga Hreiðars. úr 10. bekk. Lið B var skipað þeim Hlöðveri úr 8. bekk, Davíð Helga úr 9. bekk og Ármanni úr 10. bekk. Liðin drógust hvort gegn öðru í fyrstu umferð og bar lið B sigur úr býtum og lið A var því úr leik. Lið B sigraði næst lið Öxarfjarðarskóla og var þar með komið í úrslit keppninnar. Þar mættu Húsvíkingarnir Mývetningum og höfðu betur, 16-14. Hlaut skólinn að launum veglegan farandbikar auk þess sem keppendur fengu að gjöf nýja útgáfu Trivial Pursuit spurningaspilsins. J.H.

Þann 1. desember næstkomandi verða ljósin tendruð á jólatrénu á Húsavík. Það er sunddeild Völsungs sem hefur umsjón með dagskránni en hún hefst kl. 18.00.

Sveitarstjórn Norðurþings hefur samþykkt nýja skipulagsskrá fyrir Lista- og menningarsjóð Norðurþings. Þeir sem standa að lista og menningarstarfi í sveitarfélaginu eru hvattir til að kynna sér skipulagsskrána.

Fullveldishátíð 30. nóvember 2006 Skólarnir á Húsavík efna til sameiginlegrar samkomu í íþróttahöllinni á Húsavík fimmtudaginn 30. nóvember 2006 kl. 13:00

Síðastliðið miðvikudagskvöld frumsýndi 10. bekkur Borgarhólsskóla leikritið "Hvort er ég barn eða fullorðinn?". Verkið er samið af Kristjönu Maríu Kristjánsdóttur og leikstýrði hún verkinu einnig. Þetta leikrit fjallar um samskipti unglinga við foreldra sína og sýnir ýmis fjölskyldumynstur...sem flestir ættu að kannast eitthvað við.

Búið er að draga út vinningshafa úr Lukkupotti "Virkjum alla" og er hægt að sjá nöfn þeirra heppnu inn á www.skjalfandi.is   Dregið var úr nöfnum þeirra sem komnir voru með þjónustugátt hjá sveitarfélögunum þremur, sem standa að "Virkjum alla" það eru: Norðurþing, Aðaldælahreppur og Þingeyjarsveit Vinningarnir voru 28 og nöfnin í Lukkupottinum voru 368. Útdrátturinn fór fram þann 22. nóvember hjá Sýslumanninum á Húsavík.    Pétur Berg Eggertsson

Haldið var upp á 110 ára afmæli Borgarhólsskóla á Húsavík 22. nóvember.  Árið 1896 reistu Húsvíkingar fyrst skólahús og Barnaskóli Húsavíkur, síðar Borgarhólsskóli, varð til. Í tilefni dagsins var gestum og gangandi boðið í heimsókn og kennt var fyrir opnum tjöldum.  Þrjár skemmtanir voru á sal skólans, þar sem nemendur voru með ýmis atriði.  Mikið af munum frá fyrri tíð voru á göngum skólans.   Útbúin var kennslustofa frammtíðinnar sem byggðist mikið á áli.  Nemendur unnu á þemadögum  um fortíð, nútíð og framtíð skólans.  Hægt er að skoða myndband sem einn nemendahópurinn gerði um sögu skólans, með því að ýta á "Lesa meira".    

Gönguskíðafólk athugið! Nú hafa verið troðnar brautir fyrir gönguskíði í Aðaldalshrauni. Brautirnar eru í einstöku umhverfi og eru allir áhugasamir hvattir til að nýta sér aðstöðuna.

Tíminn til þess að komast í lukkupottinn á Veftorgunum hefur verið framlengdur um eina viku. Dregin verða út nöfn vinningshafa, af þeim sem verða komnir með þjónustugátt fyrir 22. nóvember í stað 15. nóvember og eru vegleg verðlaun í boði. Meðal vinninga eru: Fartölva, út að borða, "Saga Húsavíkur", gisting á Narfastöðum, hvalaskoðun og fleira.    Nöfn hinna heppnu verða birt á vefsíðu veftorganna fimmtudaginn 24. nóvember. 

Opnuð hefur verið ný heimsíða fyrir Kelduhverfi. Þar er að finna  fréttir, upplýsingar ofl. sem tengist svæðinu. Gugga í Lóni tekið við sem umsjónarmaður og er heimasíðan vistuð hjá Stefnu á Akureyri líkt og heimasíða Norðurþings og hefur hún sömu uppbyggingu. Vefslóðin er: http://www.kelduhverfi.is einnig er hægt að komast á hana með því að ýta á hnappinn hér efst  með heitið "Kelduhverfi". Nýjustu fréttir birtast svo sjálfkrafa ásamt fréttum að öðrum undirsíðum Norðurþings á svæðinu “Fréttir úr Norðurþingi”