Fréttir

Á heimasíðu leikskólans Bestabæjar er í gangi skoðanakönnun um nafn á nýjan leikskóla. Nú eru unnið að stækkun Bestabæjar og verður nýr og stærri leikskóli opnaður þar í haust ásamt því sem starfsemi leikskólans í Bjarnarhúsi verður hætt. Af því tilefni hefur verið ákveðið að finna nýtt nafn á leikskólann.

Fyrsti formlegi fundur félgsins  “Samvinnusýningin á Húsavík” var haldinn í Safnahúsinu á Húsavík 28. mars.   Guðsteinn Einarsson formaður stjórnar Sambands íslenskra samvinnufélaga og Tryggvi Finnsson stjórnarformaður KÞ undirrituðu stofnsamþykktir félagsins.  

Slökkvilið Raufarhafnar æfði sig í slökkvistörfum með því að kveikja í tveimur íbúðarhúsum sem staðið hafa auð um skeið og voru orðin óíbúðarhæf. Húsin eru annars vegar Árblik og Kveldblik og hins vegar Bakki. Árblik var byggt 1930 en Kveldblik sem var áfast Árbliki var byggt 1945. Bakki var byggður 1930 en viðbyggingar við húsið gerðar síðar. Húsin voru í eigu Norðurþings. Í slökkviliði Raufarhafnar eru nú 7 virkir slökkviliðsmenn og var þetta kærkomin æfing fyrir þá þar sem ekki hefur verið útkall síðan í ágúst 2005 . Slökkviliðsstjóri er Óskar Óskarsson.  

Valgerður Sverrisdóttir, utanríkisráðherra, sagði á málþingi á Húsavík í dag að vel hugsanlegt væri að álver rísi í Þingeyjarsýslu. Það álver myndi fá raforkuna frá jarðhitavirkjun og bygging slíks orkuvers hefði ekki áhrif á umhverfið þar um slóðir. Sagðist Valgerður vera þeirrar skoðunar, að um væri að ræða atvinnustarfsemi sem rúmist vel innan marka sjálfbærrar þróunar.

Nemendur í 7. bekk Borgarhólsskóla eru að sýna söngleikinn Grease á Skólasamkomu Borgarhólsskóla 2007. Sýningar fara fram á sal skólans.  Þetta er frábær sýning sem enginn ætti að láta fram hjá sér fara.  Næstu sýningar eru 21. og 22. mars kl. 20. Miðaverð er 1000 kr. fyrir fullorðna 500 fyrir nemendur skólans og frítt fyrir yngri. Allur ágóði af sýningunni fer í ferðasjóð 7. bekkjar.  Á skólasamkomunni eru einnig atriði frá öðrum nemendum skólans. Sjá nánar á vef Borgarhólsskóla

Lokahátíð Stóru upplestrarkeppninnar í 7. bekk verður haldin í Safnahúsinu Húsavík þriðjudaginn 27. mars n.k. og hefst kl. 14:00 Keppendur eru nemendur úr 7. bekk Borgarhólsskóla,  Hafralækjarskóla, Litlulaugaskóla og Grunnskóla Skútustaðahrepps. Á  milli upplestraratriða koma fram nemendur úr Tónlistarskólunum á svæðinu og flytja tónlist. Foreldrar og aðrir velunnar skólanna eru hvattir til að koma og hlýða á það sem nemendurnir hafa fram að færa.   Fh. Héraðsnefndar Sigurður Aðalgeirsson Fjölskylduþjónustu Þingeyinga

Unnið er í því að yfirfara og samræma í vefsíðum Norðurþings.  Nú eru komnar upp vefsíður fyrir Raufarhöfn og Kelduhverfi.  Vefsíðan um Raufarhöfn er á vefslóðinni: http://www.raufarhofn.is/ og Kelduhverfi á vefslóðinni http://www.kelduhverfi.is/.  Unnið er að uppsetningu á vefsíðu fyrir Öxarfjörð.  Hún verður á vefslóðinni: http://www.dettifoss.is/ og mun opna von bráðar. Þessar vefsíður verða með upplýsingum fyrir íbúa á svæðinu og ferðamenn.  Allir grunnskólarnir í Norðurþingi eru komnir með nýjar vefsíður, einnig Leikskólinn Bestibær og Félagsmiðstöðin Keldan.  Unnið er að vefsíðu fyrir Tónlistaskóla Húsavíkur og félags- og skólaþjónustuna.  Allar undirsíður Norðurþings eru tengdar við vefsíðu Norðurþings þannig að fréttir sem eru settar inn á þær birtast sjálfkrafa á í kassann "Fréttir úr Norðurþingi" 

Samþykkt var á fundi fjölskyldu- og þjónustráðs Norðurþings eftirfarandi skipulag á Vinnuskóla sveitarfélagsins sem tekur gildi sumarið 2007.    

Föstudaginn 9.mars var nýr íþróttasalur tekin í notkun í nýbyggingu leikskólans Bestabæjar. Salurinn er 88 fermetrar að stærð og hægt er að skipta honum í tvö rými með rennihurð. Nú hefur verktakinn fengið gamla salinn afhentan til framkvæmda. Þar er nú búið að brjóta upp gólfið og hluta af gólfi í útidyragangi sunnan megin í húsinu. Af því tilefni verða börn og foreldrar að sýna þolinmæði og tillitsemi vegna ryks sem kann að hljótast af því. Seinni partinn í mars stendur til að flytja tvær deildir yfir í nýbygginguna og þá hefjast endurbætur á eldra húsnæðinu.

Á fundi Byggðarráðs 8. mars sl. var rætt um lækkun virðisaukaskatts og sérstaklega að hún skili sér í lægra verði á máltíðum til grunn- og leikskólabarna.  Framkvæmdastóra stjórnsýslu- og fjármalasviðs var falið að fylgjast með að umrædd lækkun skili sér til nemenda í grunn- og leikskólum sveitarfélagsins.

Komið er út fréttabréf Norðurþings fyrir febrúar og er þetta er fyrsta fréttabréf Norðurþings.  Meðal efnis er ávarp Bergs sveitarstjóra sem hann nefnir "Nýir tímar í nýju sveitarfélagi".  Einnig er viðtal við Guðbjart fjármálastjóra og Elísubetu dreifbýlisfulltrúa.  Í fréttabréfinu er listi yfir alla sem eru í stjórnum, nefndum og ráðum fyrir Norðurþing ofl.  Fréttabréfinu var dreift í öll hús í sveitarfélaginu.  Einnig er hægt að nálgast það hér á heimasíðunni í pdf formi. Skoða fréttabréf

  Auglýsing um skipulag á Kópaskeri. Breyting á aðalskipulagi 1990-2010. Sveitarstjórn Norðurþings samþykkti á fundi sínum þann 16. janúar 2007 að auglýsa tillögu að óverulegri breytingu á aðalskipulagi Kópaskers 1990-2010.  Skipulagstillagan er auglýst með vísan til 2. mgr. 21. gr skipulags og byggingalaga nr. 73/1997 með síðari breytingum.