Fréttir

Bæjarstjórn Húsavíkurbæjar samþykkti samhljóða á fundi sínum í gær þríhliða samkomulag Vísis hf., Fiskiðjusamlags Husavíkur hf. og Húsavíkurbæjar um viðskipti með hlutabréf bæjarins í Fiskiðjusamlaginu, uppbyggingu rækjuveiða og vinnslu á Húsavík og uppbyggingu bolfiskvinnslu á Húsavík, sem samþykkt hafði verið samhljóða í bæjarráði 2. okt. s.l.

Mánudaginn 20. okt. s.l. var stofnað nýtt fjárfestingarfélag, Fjárþing ehf. í Þingeyjarsýslum. Stofnendur félagsins eru öll aðildarsveitarfélög Héraðsnefndar Þingeyinga, að einu undanskildu ásamt nokkrum fyrirtækjum á svæðinu. Tilgangur félagsins er að lána jafngildi 150 milljóna króna til uppbyggingar kísilduftverksmiðju í Mývatnssveit og leggja þannig lóð á vogarskálar þess að þær áætlanir nái fram að ganga.

Húsavíkurbær, Aðaldælahreppur og Þingeyjarsveit sameinuðust um að taka þátt í samkeppninni um Rafrænt samfélag á vegum Byggðastofnunar. Allmörg sveitarfélög á landinu tóku þátt í keppninni. Nú liggur fyrir að verkefni þessara þriggja sveitarfélaga hefur orðið fyrir valinu, ásamt einu öðru verkefni. Málið verður kynnt á blaðamannafundi í Þjóðmenningarhúsinu í Reykjavík 24. september (í dag) kl. 14:00 en þar mun Iðnaðarráðherra gera grein fyrir málinu ásamt formanni valnefndar. Þá munu fulltrúar verkefnanna gera grein fyrir væntingum til framhaldsins.

Skip Greenpeace, Rainbow Warrior, kom í morgun til Húsavíkur og fóru hvalaskoðunarbátar Norðursiglingar til móts við skipið á Skjálfanda. Tilkomumikið var að sjá flotann koma inn flóann. Rainbow Warrior liggur við Norðurgarð og tók bæjarstjóri á móti skipinu og bauð skipverja velkomna og færði skipstjóranum flagg Húsavíkurbæjar.

Bæjarráð Húsavíkurbæjar samþykkti á fundi sínum, fimmtudaginn 21. ágúst, bókun varðandi yfirstandandi hvalveiðar við Ísland. Bæjarráð hafði, í júlí s.l. sent stjórnvöldum áskorun þess efnis að vísindarannsóknir á hvölum yrðu framkvæmdar í samráði við hvalaskoðunarfyrirtækin í landinu og hagsmunaaðila ferðaþjónustunnar. Bókunin er eftirfarandi:

Fimmtudaginn 31. júlí 2003 voru opnuð hjá Siglingastofnun tilboð í dýpkun Húsavíkurhafnar, Grímseyjarhafnar og Flateyjarhafnar.  2 tilboð bárust í verkið. Sæþór ehf        kr. 65.424.000 –          107,4% Ístak hf.            kr. 75.721.061 –          124,3% Kostnaðaráætlun Siglingastofnunar hljóðaði upp á kr. 60.903.800 –

“Bæjarráð Húsavíkurbæjar beinir þeim eindregnu tilmælum til sjávarútvegsráðherra og stjórnvalda að ekki verði hafnar veiðar á hvölum í nágrenni við hvalaskoðunarsvæðin hér fyrir Norðausturlandi. Bæjarráðið skorar á ráðuneytið að hafa fullt samráð við ferðaþjónustuaðila og samtök þeirra áður en ákvörðun um hugsanlegar hvalveiðar verður tekin. Bæjarráð leggur jafnframt mikla áherslu á þá staðreynd að hvalaskoðun er orðin ein vinsælasta afþreying ferðamanna hér á landi og að greinin er að skapa fjölmörgum fyrirtækjum og þjóðarbúinu verulegar tekjur og landinu afar jákvæða ímynd.”

Dagana 8. til 10. ágúst næstkomandi verða Mærudagar haldnir á Húsavík. Dagskráin verður auglýst þegar nær dregur m.a. í Skránni. Nýjasti viðburðurinn á Mærudögum verður Íslandsmót í Sandspyrnu. Sandspyrna er knattspyrna í sandi og verður völlur útbúinn fyrir þetta tækifæri í fjörunni við hliðina á uppfyllingunni. Þetta mun verða í fyrsta sinn sem slíkt mót er haldið á Íslandi. Markaðsráð Húsavíkur og nágrennis sér um undirbúning Mærudaga 2003. Túpílakar á Mærudögum 2001

  Ný hafnalög taka gildi 1. júlí n.k. og hefur samgönguráðherra gefið út nýja gjaldskrá skv. bráðbirgðaákvæði þeirra sem gildir frá 1. júlí n.k. Gjaldskrána er að finna undir “Upplýsingar / Gjaldskrár” hér á síðunni.

Samkvæmt upplýsingum frá skrifstofu Svæðisvinnumiðlunar Norðurlands eystra á Húsavík vantar fólk til sumarafleysinga í ýmis störf á svæðinu. Áhugasömum er bent á síma Svæðisvinnumiðlunarinnar 464 1111. Þessi eftirspurn hefur þegar haft áhrif á þau atvinnuátaksverkefni sem Húsavíkurbær hefur ákveðið að standa að í sumar.

Á fundi bæjarráðs Húsavíkurbæjar 5. júní s.l. var samþykkt eftirfarandi bókun sem hér með er komið á framfæri: "Bæjarráð Húsavíkurbæjar lýsir yfir stuðningi við framkomnar hugmyndir um hækkun húsnæðislána Íbúðalánasjóðs í 90%"

Á fundi bæjarráðs þann 14.maí s.l. var samþykkt Framtíðarsýn fyrir stjórnsýslu og þjónustu Húsavíkurbæjar 2003 - 2007. Um er að ræða fyrri hluta í vinnu vegna endurskoðunar á stjórnskipulagi sveitarfélagsins en stefnumótunin var m.a. unnin af sameiginlegum hópi starfsmanna og bæjarfulltrúa fyrr á þessu ári.