Ársreikningur Norðurþings 2025

Byggðarráð þakkar Hólmgrími frá Deloitte fyrir ítarlega og góða yfirferð á ársreikningi 2025.

Byggðarráð vísar ársreikningnum til fyrri umræðu í sveitarstjórn.

Til máls tóku: Katrín, Helena og Hjálmar.

Sveitarstjórn samþykkir samhljóða að vísa ársreikning fyrir árið 2025 til síðari umræðu í sveitarstjórn.

Byggðarráð þakkar Níelsi Guðmundssyni fyrir góða og ítarlega yfirferð á ársreikningi 2025 og vísar honum til seinni umræðu og staðfestingar í sveitarstjórn.

Til máls tóku: Katrín, Helena og Hjálmar.

Meirihluti sveitarstjórnar leggur fram eftirfarandi bókun:
Á kjörtímabilinu 2022-2026 hefur verið unnið markvisst að því að efla rekstur Norðurþings, styrkja innviði og bæta þjónustu við íbúa. Endurskoðun ársreiknings fyrir árið 2025 staðfestir að reikningsskil sveitarfélagsins gefa glögga mynd af afkomu þess, efnahag og breytingu á handbæru fé.
Rekstrartekjur A- og B-hluta námu 7.103 m.kr. árið 2025 og hækkuðu um 279 m.kr. milli ára, eða 4,1%. Tekjur samstæðunnar voru jafnframt 6,6% yfir áætlun. Þetta sýnir að tekjugrunnur sveitarfélagsins var sterkari en varlega áætlað var.
Á sama tíma hefur kostnaðarþrýstingur aukist. Laun og launatengd gjöld námu 3.904 m.kr. og hækkuðu um 8,8%, milli ára. Launakostnaður var 55% af rekstrartekjum árið 2025, samanborið við 53% árið áður þrátt fyrir að stöðugildum fækkaði. Þá nam gjaldfærð hækkun lífeyrisskuldbindinga 528 m.kr., sem er veruleg hækkun frá árinu áður.
Rekstrarniðurstaða sveitarfélagsins var betri en áætlanir gerðu ráð fyrir. Samstæða A- og B-hluta var rekin með 16,3 m.kr. halla, samanborið við 48,3 m.kr. í fjárhagsáætlun eða .32 m.kr. betri en áætlað hafði verið. A-hluti sveitarfélagsins skilaði jákvæðri niðurstöðu upp á 8,9 m.kr. sem er í samræmi við áætlun.
Á árinu 2025 námu fjárfestingar í varanlegum rekstrarfjármunum 978 m.kr., sem var mjög nálægt áætlun um 1.001 m.kr. Varanlegir rekstrarfjármunir hækkuðu um 971 m.kr. og námu 9.711 m.kr. í árslok 2025. Meðal stærstu fjárfestinga voru nýbygging Frístundar, 339 m.kr., framkvæmdir við gervigrasvöll, 140 m.kr., gatnaframkvæmdir við Ásgarðsveg, 41 m.kr., Suðurfjöru, 36 m.kr., og afleggjara við Rifós á Kópaskeri, 29 m.kr. Þá fjárfesti Orkuveita Húsavíkur fyrir 227 m.kr.í veitukerfum og búnaði. Þessi uppbygging hefur skilað sér í sterkari innviðum fyrir íbúa, þar sem áhersla hefur verið lögð á börn, ungmenni og fjölskyldur.
Í rekstri var áherslan sömuleiðis á börn, ungmenni og fjölskyldur með hækkun frístundastyrks, gjaldfrjálsum skólamáltíðum, morgunmat í grunnskólum, sumarfrístund, félagsmiðstöð og frístund. Þessar ákvarðanir skýra að hluta aukinn kostnað í fræðslumálum en nettó útgjöld til fræðslumála voru 113 m.kr. yfir áætlun árið 2025 einkum vegna launakostnaðar kennara og skólamáltíða.
Handbært fé sveitarfélagsins lækkaði á árinu og nam 1.099 m.kr. í árslok 2025, samanborið við 1.480 m.kr. í ársbyrjun. Þrátt fyrir lækkun er veltufjárhlutfall samstæðunnar enn sterkt, 1,81, en var 2,32 árið áður. Skuldahlutfall samstæðunnar hækkaði úr 62% í 71%, en er áfram langt undir lögbundnu 150% viðmiði um skuldahlutfall sveitarfélaga.
Í atvinnu- og innviðamálum hefur verið unnið að fjölbreyttum verkefnum, meðal annars tengdum Bakka, orkumálum, fiskeldi, byggðakvóta, hafnarmálum og nýsköpun. Auknar skatttekjur og tekjur yfir áætlun benda til þess að þessi uppbygging sé farin að styðja við tekjugrunn sveitarfélagsins.
Í heild sýna tölurnar að Norðurþing hefur ráðist í mikla uppbyggingu, bætt þjónustu við íbúa og haldið utan um rekstur með ábyrgum hætti. Áskoranirnar eru skýrar: launakostnaður, lífeyrisskuldbindingar og lækkun handbærs fjár. En staðan sýnir jafnframt sterkan tekjugrunn, fjárfestingu í framtíðinni og rekstur sem skilar betri niðurstöðu en áætlað var.
Eiður Pétursson
Helena Eydís Ingólfsdóttir
Hjálmar Bogi Hafliðason
Kristinn Jóhann Lund
Soffía Gísladóttir

Ársreikningur Norðurþings fyrir árið 2025 er samþykktur samhljóða.