Fréttir

Við útskrift Viðskiptaháskólans á Bifröst s.l. laugardag voru þær Guðrún Árnadóttir (Dúna), og Guðrún Björg Aðalsteinsdóttir, sem nú nýlega unnu verkefni í samstarfi við Húsavíkurbæ og frá var greint hér á heimasíðunni, heiðraðar fyrir framúrskarandi námsárangur á fyrstu tveimur árum til BS prófs í viðskiptafræði.

Á fundi bæjarstjórnar 24. maí s.l. voru ársreikningar Húsavíkurbæjar fyrir 2004 afgreiddir við síðari umræðu. Helstu niðurstöður hans voru birtar í fréttatilkynningu þ. 11. maí s.l.

Á fundi bæjarstjórnar 24. maí s.l. var samhljóða samþykkt svofelld ályktun sem borin var upp sameiginlega af oddvitum meiri- og minnihluta bæjarstjórnar: “Bæjarstjórn Húsavíkurbæjar tekur heils hugar undir sjónarmið og ábendingar til ríkisvaldsins um mikilvægi þess að flytja ríkisstofnanir til Akureyrar.  Eðlilegt hlýtur að teljast að þær stofnanir ríkisins sem aðallega fást við mál sem snúa að landsbyggðinni s.s. sjávarútvegsmál, landbúnaðarmál og náttúrufars- og skipulagsmál séu staðsettar utan Reykjavíkur.  Má í þessu samhengi benda á stofnanir eins og Skipulagsstofnun, Náttúrufræðistofnun Íslands og Veiðimálastofnun.

Í tilefni að 10 ára afmæli Leikskólans í Bjarnahúsi hittust börn, foreldrar og starfsfólk síðast liðinn laugardag og gerðu sér glaðan dag. Síðar um daginn var bæjarbúum boðið í heimsókn og að skoða listaverk sem börnin hafa unnið í vetur.

Í morgun var stigið fyrsta skrefið í mótun innkaupastefnu Húasvíkurbæjar. Starfsmönnum Húsavíkurbæjar voru afhent innkaupakort sem nota á við vörukaup fyrir Húsavíkurbæ og stofnanir hans. Kortin eru með sama sniði og almenn kreditkort og hafa þeir starfsmenn sem annast innkaup í nafni Húsavíkurbæjar slík kort til umráða.

Skipuð hefur verið samstarfsnefnd vegna undirbúnings kosninga um tillögu um sameiningu sjö sveitarfélaga í Þingeyjarsýslum, Aðaldælahrepps, Húsavíkurbæjar, Kelduneshrepps, Raufarhafnarhrepps, Skútustaðahrepps, Tjörneshrepps og Öxarfjarðarhrepps.  Í nefndinni sitja tveir fulltrúar sveitarstjórnar í hverju sveitarfélagi. 

Aðfararnótt síðastliðins laugardags snjóaði hér á Húsavík. Um morguninn var því hvítt teppi yfir bæjarlandinu eins og meðfylgjandi mynd ber með sér. Þóttu aðstæður óásættanlegar til ruslatínslu, en einmitt þennan dag hafði verið gert ráð fyrir allsherjar hreinsunardegi á Húsavík.

Hér má skoða verkáætlun sem lögð var fram til kynningar á síðasta fundi umhverfis og framkvæmdanefndar.  

Orkuveita Húsavíkur mun á næstu vikum  hefja framkvæmdir við lögn frá borholu á Höfða, að Sundlaug Húsavíkur.  Áætlaður kostnaður við þetta verk er um 6 millj. kr..  Vatnið úr þessari borholu  hefur reynst hafa mjög góð áhrif á húðsjúkdóma og er 10 ára góð reynsla af notkun þess í svokölluðu Ostakari sem staðsett er á Húsavíkurhöfða við hlið holunnar.

Á síðustu vikum hafa tveir Húsvíkingar sem stunda nám við Viðskiptaháskólann á Bifröst unnið að verkefnum sem tengjast Húsavík ásamt hópfélögum sínum. Guðrún Björg Aðalsteinsdóttir hefur ásamt fimm öðrum nemendum við skólann unnið að verkefni sem  fjallar um heilsutengda ferðaþjónustu á Húsavík. Verkefnið er unnið í samstarfi við Húsavíkurbæ, Atvinnuþróunarfélag Þingeyinga og Heilbrigðisstofnun Þingeyinga.

Ársreikningar Húsavíkurbæjar fyrir árið 2004 voru til fyrri umræðu í bæjarstjórn í gær, 10. maí 2005.  Samkvæmt sveitarstjórnarlögum skal fjalla um ársreikninginn á tveimur fundum í sveitarstjórn og verður hann aftur til umfjöllunar í bæjarstjórn Húasvíkurbæjar 24. maí 2005.  

Fundur verður haldinn í Bæjarstjórn Húsavíkurbæjar, þriðjudaginn 24. maí  2005 og hefst hann kl. 16.00. Fundarstaður er Blái salurinn í Félagsheimili Húsavíkur.