Fræðslu- og menningarnefnd Norðurþings

Fulltrúar Öxarfjarðarskóla, Guðrún S. Kristjánsdóttir skólastjóri, Hrund Ásgeirsdóttir aðstoðarskólastjóri, Kristín Gunnarsdóttir fulltrúi kennara og Jón Ármann Gíslason fulltrúi foreldra mættu á fundinn. Guðrún kynnti starfsemi skólans og starfsáætlun vegna skólaársins 2014-2015. Stefán Leifur Rögnvaldsson leit við á fundinum undir þessum lið á leið sinni í göngur.

Fyrir fundinum liggur tillaga að samningi við Kristinn Sigurð Yngvason á Tóvegg. Fræðslu- og menningarnefnd staðfestir fyrirliggjandi samning og felur Fræðslu- og menningarfulltrúa að ganga frá samningi fyrir hennar hönd. Fulltrúar Öxarfjarðarskóla viku af fundi kl. 11:00.

Fulltrúar Grunnskóla Raufarhafnar Frida Elisabeth Jörgensen skólastjóri, Sigrún Björnsdóttir fulltrúi starfsfólks og Nanna Steina Höskuldsdóttir fulltrúi foreldra mættu á fundinn. Frida Elisabeth kynnti starfsemi skólans og starfsáætlun vegna skólaársins 2014-2015, jafnframt var lögð fram ársskýrsla skólans vegna skólaársins 2013-2014.

Fyrir fundinum liggur tillaga að samningi við Kristinn Rúnar Tryggvason vegna aksturs skólabarna frá Raufarhöfn í Lund skólaárið 2014-2015. Fræðslu- og menningarnefnd samþykkir fyrirliggjandi samning og felur Fræðslu- og menningarfulltrúa að ganga frá honum fyrir hennar hönd. Fulltrúar Grunnskóla Raufarhafnar viku af fundi kl. 15:15.

Fyrir nefndinni liggur erindi frá félagi kennara í nýsköpunar- og frumkvöðlamennt (FNF) þar sem kallað er eftir samvinnu heimamanna, skólasamfélagsins og atvinnulífsins í Norðurþingi um verkefni sem lýtur að nýskapandi samfélagi. Stefnt er að umsókn í Erasmus+ styrkáæltun Menntaáætlunar ESB með umsóknarfrest í mars eða apríl 2015. Verkefnishugmyndin miðar að því að Norðurþing verði "tilraunasamfélag" þar sem áherslur allra skólastiga verða samþættar í átt til nýsköpunar og frumkvöðlamenntar. Verkefnistími er áætlaður þrjú ár. Leiðandi aðili meðal heimamanna verði Þekkingarnet Þingeyinga sem jafnframt verður aðalumsækjandi í Erasmus+ umsókn. Á fyrstu stigum í umsóknarferlinu er kallað eftir samstarfi við Þekkingarnet Þingeyinga, Atvinnuþróunarfélag Þingeyinga, Framhaldsskólann á Húsavík og Norðurþing vegna leik- og grunnskóla sveitarféalgsins. Óskað er eftir samstarfsyfirlýsingum framangreindra aðila auk þess sem þess er óskað að þeir tilnefni fulltrúa í verkefnisstjórn. Verkefnið hefur þegar verið kynnt skólastjórum leik- og grunnskóla í Norðurþingi og hafa þeir lýst yfir áhuga sínum til samstarfs. Leitað verður eftir styrk til Vaxtarsamnings Norðurlands Eystra vegna kostnaðar við umsókn í Erasmus+, fáist sú umsókn samþykkt mun kostnaður við verkefnið greiðast að fullu úr þeim sjóði. Fræðslu- og menningarnefnd lýsir fyrir hönd Norðurþings yfir vilja til samstarfs um framangreint verkefni og tilnefnir Erlu Sigurðardóttur, Fræðslu- og menningarfulltrúa í verkefnisstjórn fyrir hönd sveitarfélgsins.

Samningur Mennta- og menningarmálaráðherra Íslands og Barna- og menntamálaráðherra Danmerkur um skilyrtan stuðning við Dönskukennslu á Íslandi árin 2014 til 2019 lagður fram til kynningar.

Bréf frá verkefnisstjórn verkefnisins Göngum í skólann til sveitarstjórna lagt fram til kynningar. Markmið verkefnisins er að hvetja börn til að velja sér virkan ferðamáta í og úr skóla. Fræðslu- og menningarnefnd hvetur skóla sveitarfélagsins til virkrar þátttöku í verkefninu eftir því sem aðstæður leyfa og beinir því til Fræðslu- og menningarfulltrúa að vekja athygli á verkefninu á heimasíðu sveitarfélagsins.