Skipulags- og byggingarnefnd Norðurþings

Í ljósi lóðarfyrirspurna og þess að fátt er um lausar iðnaðarlóðir við Húsavík utan Bakka leggur skipulags- og byggingarfulltrúi til að farið verði í vinnu við gerð nýs deiliskipulags iðnaðarsvæðis á Kaldbaksleiti (I5). Fyrirliggjandi deiliskipulag frá 1997 nær ekki yfir allt iðnaðarsvæðið og er að mörgu leyti úrelt.

Skipulags- og byggingarnefnd felur skipulags- og byggingarfulltrúa að láta vinna skipulagslýsingu fyrir deiliskipulag svæðisins.

Farið var yfir atriðalista frá Arnhildi Pálmadóttur arkitekt. Eftirfarandi sjónarmiðum vill nefndin koma á framfæri við skipulagsráðgjafa.

1. Á þessu stigi verði gert ráð fyrir að einstefna verði um Garðarsbraut til austurs frá gatnamótum við Öskju. Ekki verði opnuð leið af Árgötu inn á Mararbraut að svo komnu.
2. Nefndin fellst á framlagða breytingu á bílastæði framan við skóbúð.
3. Nefndin er sammála vangaveltum um styrkingu tengingar Búðarvallar við skrúðgarð sunnan Árholts.
4. Skipulagsnefndin fellst á þá tillögu sem liggur fyrir um opnun farvegs Búðarár.

Óskað er eftir leyfi til að leggja slóða að fyrirhugaðri námu í Skurðsbrúnum (E-26A). Slóðinn yrði um 900 m langur frá núverandi vegslóða við Húsavíkurfjall. Leiðin verði notuð sem bráðabirgðaaðkomuleið á námusvæðið meðan námuvegur er ekki tilbúinn.

Skipulags- og byggingarnefnd telur rask við gerð vegslóðans lítið og heimilar því Vegagerðinni að leggja slóðann.

Óskað er eftir fresti til byrjunar júlí 2015 til að skila inn teikningum af húsi á lóðina að Lyngholti 3.

Skipulags- og byggingarnefnd fellst á að veita lóðarhafa frest til 30. júní n.k. til að skila inn fullnægjandi aðalteikningum af húsinu.

Óskað er eftir leyfi til að breyta gömlum útihúsum í Saltvík í gistirými og geymslu. Fyrir liggja teikningar unnar af Almari Eggertssyni.

Skipulags- og byggingarnefnd fellst á breytta notkun hússins og felur byggingarfulltrúa að gefa út byggingarleyfi þegar fullnægjandi teikningar hafa borist.

Óskað er eftir umsögn um leyfi fyrir sölu gistingar í efri hæð Hótel Höfða að Höfða 24b. Örlygur Hnefill vék af fundi við umfjöllun þessa máls.

Skipulags- og byggingarnefnd veitir neikvæða umsögn um erindið þar sem ekki hefur farið fram fullnægjandi öryggisúttekt á húsnæðinu.

Óskað er umsagnar um leyfi til sölu gistingar í flokki II í íbúð 0201 að Höfða 20. Örlygur Hnefill vék af fundi við afgreiðslu þessa erindis.

Skipulags- og byggingarnefnd veitir jákvæða umsögn um erindið, enda verði eingöngu leigð út til gistingar þau rými íbúðarinnar sem til þess eru ætluð skv. samþykktum teikningum.

Óskað er umsagnar um leyfi til sölu gistingar í flokki II í íbúð 0104 að Grundargarði 13.

Skipulags- og byggingarnefnd veitir jákvæða umsögn um erindið, enda verði eingöngu leigð út til gistingar þau rými íbúðarinnar sem til þess eru ætluð skv. samþykktum teikningum.

Óskað er umsagnar um leyfi til sölu heimagistingar í íbúðarhúsinu að Árdal í Kelduhverfi.

Skipulags- og byggingarnefnd veitir jákvæða umsögn um erindið, enda verði eingöngu leigð út til gistingar þau rými sem til þess eru ætluð skv. samþykktum teikningum.

Óskað er umsagnar um leyfi til sölu gistingar í gistiskála í flokki II á Bjarnastöðum.

Skipulags- og byggingarnefnd veitir neikvæða umsögn um sölu gistingar í umræddum skála, enda er ekki fyrir honum leyfi og engin öryggisúttekt hefur farið fram.

Óskað er eftir áframhaldandi stöðuleyfi til eins árs fyrir 23 m² bjálkahúsi við verslunina Ásbyrgi.

Skipulags- og byggingarnefnd fellst fyrir sitt leiti á áframhaldandi stöðuleyfi fyrir húsinu til 31. maí 2016. Samþykki nefndarinnar er háð samþykki lóðarhafa.

Norðurlandsskógar óska umsagnar Norðurþings vegna fyrirhugaðrar skógræktar í landi Daðastaða í Núpasveit.

Skipulags- og byggingarfulltrúi kynnti umsögn sína dags. 20. apríl 2015.

Óskað er eftir byggingarleyfi fyrir svölum við Vallholtsveg 9 á Húsavík. Meðfylgjandi erindi er rissmynd af útliti svalanna.

Skipulags- og byggingarnefnd telur að grenndarkynna þurfi erindið áður en afstaða er tekin. Skipulags- og byggingarfulltrúa er heimilað að gefa út byggingarleyfi ef ekki eru gerðar athugasemdir af nágrönnum og þegar fullnægjandi gögn hafa borist.

Örlygur vék af fundi við afgreiðslu þessa erindis