Fréttir

Björgunarsveitin Garðar var stofnuð fyrir 50 árum af nokkrum vöskum mönnum.  Í tilefni þessara merku tímamóta býður Björgunarsveitin öllum að koma og skoða húsnæði, tækjakost og kynna sér starfsemi sveitarinnar laugardaginn 17. október milli klukkan 15:00 og 17:00.

Ferðamálastofa hefur auglýst eftir tilnefningum til Umhverfisverðlauna fyrir árið 2009. Verðlaunin hefur stofnunin veitt árlega frá árinu 1995 og er tilgangur þeirra að beina athyglinni að þeim ferðamannastöðum eða fyrirtækjum í ferðaþjónustu sem sinna umhverfismálum í starfi sínu og framtíðarskipulagi.

Fimmtudagskvöldið 8. október mun Ólafur K. Nielsen halda fyrirlestur í Gljúfrastofu um rjúpnaveiðar, ástand rjúpnastofnsins og veiðistjórnun. Ólafur, sem er vistfræðingur, hefur verið lykilmaðurinn í rannsóknum á rjúpu undanfarna áratugi. Einnig mun Jóhann Gunnarsson frá Víkingavatni vera á staðnum og svara fyrirspurnum um minkaveiðar og lífshætti minksins. Fyrirlesturinn hefst kl. 20:00 og eru allir velkomnir.

Félagsheimilið Skúlagarður í Kelduhverfi er laust til leigu frá og með 1. janúar 2010. Á undanförnum árum hefur verið rekin ferðaþjónusta í Skúlagarði sem er staðsettur við Litluá og nálægt Ásbyrgi, Dettifoss og Hljóðaklettum.

Menningar- og fræðslunefnd Norðurþings auglýsir eftir umsóknum um styrki til lista- og menningarmála. Styrkirnir eru veittir samkvæmt skipulagsskrá Lista- og menningarsjóðs Norðurþings og reglum um úthlutun úr sjóðnum.  

Þekkingarsetur Þingeyinga hefur nú gefið út Íslenskuspilið í samstarfi við Selmu Kristjánsdóttur.  Selma er höfundur spilsins og vann að gerð spilsins hjá Þekkingarsetrinu á árunum 2007-2009.  Tilgangur Íslenskuspilsins er að stuðla að námi fullorðinna útlendinga í íslensku en spilið nýtist einnig á elsta stigi grunnskóla og í framhaldsskólum. Það býður upp á fjölbreyttar nálganir í hópa- og einstaklingsvinnu eða þar sem kennarinn leiðir vinnuna. Þar af leiðandi hentar Íslenskuspilið fólki á öllum stigum íslenskunáms.

Stofnun Árna Magnússonar í íslenskum fræðum, Menningarráð Eyþings og Urðarbrunnur (Hið þingeyska fornleifafélag, Þingeyskur sagnagarður og Fornleifaskóli barnanna)gangast fyrir fundi um örnefni og örnefnasöfnun á Norðurlandi eystra miðvikudaginn 23. september, kl. 20.30 í Litlulaugaskóla í Reykjadal, Þingeyjarsýslu.

Norðurþing hefur unnið að aðalskipulagi fyrir sveitarfélagið síðan vorið 2008 og nú liggja fyrir drög að markmiðum, stefnu og skipulagsákvæðum Aðalskipulags Norðurþings 2009-2029. Vinnsla aðalskipulags er umfangsmikið verkefni og til hægðarauka hefur því verið skipt upp í nokkra áfanga. Á vef Norðurþings hafa verið kynntar áfangaskýrslur um meginforsendur og framtíðarsýn, landslag og verndarsvæði og skipulag þéttbýlanna. Haldnir hafa verið tveir íbúafundir í Skúlagarði og einn á hverjum þéttbýlisstaðanna til að ræða forsendur og drög að tillögu (sjá eldri fréttir um aðalskipulagsgerðina).

33. fundur sveitarstjórnar Norðurþings verður haldinn í stjórnsýsluhúsi Norðurþings, þriðjudaginn 15. september n.k. og hefst kl. 16:00. Dagskrá fundarins má sjá hér að neðan.  

Frá og með 1. september til og með 31. apríl verður opnunartími Sundlaugar Húsavíkur eftirfarandi: Mánudag - föstudag 6:45 - 9:30 Mánudag - föstudag 16:00 - 21:00 Laugardag og sunnudag 10:00 - 17:00  

Þann 3. október n.k. verður hinn árlegi Hrútadagur haldinn á Raufarhöfn. Þar verða lambhrútar til sölu, frá Öxarfjarðar- Sléttu- og Þistilfjarðar-varnarhólfum.  Sigurgeir Þorgeirsson ráðuneytisstjóri í Sjávarútvegs- og landbúnaðarráðuneytinu mun setja samkomuna.  

Menningarráð Eyþings auglýsir eftir umsóknum um styrki á grundvelli  samnings menntamála- og iðnaðarráðuneytis við Eyþing frá 27. apríl 2007. Tilgangur styrkjanna er að efla menningarstarfsemi og menningartengda ferðaþjónustu á Norðausturlandi.