Fréttir

Þátttakendum í hreinsunardegi laugardaginn 19. maí er þökkuð þátttakan.  Hreinsunarátak í Norðurþingi heldur áfram. Á næstu vikum mun sveitarfélagið verða með vörubíla á ferðinni við að fjarlægja garðaúrgang og annað rusl af lóðarmörkum.  Þeir sem vilja losna við stærri hluti utan/innan lóða á Húsavík/Reykjahverfi er bent á að setja sig í samband við verkstjóra þjónustustöðvar í síma 899 3418 sem mun leggja mat á hvort viðkomandi hlutur verður fjarlægður á kostnað sveitarfélagsins. Sérstaklega er ætlunin að hreinsa til á geymslusvæðum sunnan sláturhúss Norðlenska og í Tröllakoti.  Þeir sem eiga þar hluti eru beðnir um að merkja sér þá með skýrum hætti fyrir 31. maí n.k. þar sem fram kemur nafn eiganda og símanúmer og vera í sambandi við verkstjóra þjónustustöðvar varðandi áframhaldandi geymslu viðkomandi hlutar.  Gera má ráð fyrir að þeim hlutum sem ekki er gerð grein fyrir og standa utan lóða verði fargað.

Síðasta laugardag var árlegur hreinsunardagur á Húsavík.  Félagssamtökum var úthlutað svæðum og sáu félagar þess um að hreinsa sitt svæði.  Þrátt fyrir að verður hafi ekki verið með besta móti var ekki annað að sjá að mæting hafi verið góð.  Víða um bæinn mátti sjá fólk á göngu með ruslapoka að tína upp rusl stórt og smátt.  Þegar búið var að gera bæinn fínann var farið í portið við Borgarhólsskóla og gætt sér á grilluðum pylsum, safa og kaffi. 

Þriðjudaginn 15. maí fóru nemendur og starfsfólk Öxarfjarðarskóla í þjóðgarðsferð í Ásbyrgi. Nemendur unglingadeildar höfðu ásamt umsjónarkennurum sínum undirbúið dagskrá í formi pósta þar sem blandað var saman fróðleik og leikjum. Póstunum var dreift um byrgið og gengu yngri deild og miðdeild í sitt hvoru lagi á milli þeirra.

Sundnámskeið fyrir börn sem fædd eru árin 2000, 2001, 2002 og 2003, verður haldið virku dagana frá 04. júní til og með 15. júní í Sundlaug Húsavíkur. Námskeiðin eru fyrir hádegi.  Starfsfólk leikskólanna fylgir þeim börnum sem fædd eru 2001 og 2002 og eru í leikskóla fyrir hádegi.  Börn sem fædd eru 2003 eru á ábyrgð foreldra/forráðamanna. Upplýsingar og skráning eru einungis í sundlauginni í síma 464-6190.  Skráningu skal vera lokið fyrir 25. maí. Athugið ekki verður tekið við skráningu eftir þann tíma. Þátttökugjald er 3000 kr. fyrir hvert barn. Ef fleiri en eitt barn úr fjölskyldu er gjaldið 2500 kr.  Kennarar verða Harpa Aðalbjörnsdóttir og Árný Björnsdóttir. Forstöðumaður.

Kynningarfundur um drög að svæðisskipulagi háhitasvæða í Þingeyjarsýslum og umhverfismati áætlunarinnar var haldinn að Ýdölum í Aðaldal 14. maí 2007.  Frummælendur á fundinum voru:  Gaukur Hjartarson, formaður samvinnunefndar um gerð svæðisskipulagsins, Birna B. Árnadóttir frá Skipulagsstofnun, Þorkell Lindberg Þórarinsson frá Náttúrustofu Norðausturlands, Árni Ólafsson frá Teiknistofu Arkitekta og Jóna Bjarnadóttir frá VGK-Hönnun. 

Sorpsamlag Þingeyinga mun hefja á ný móttöku úrgangns að Víðimóum 2 miðvikudaginn 16. maí. Þangað til eru allir sem mögulega geta frestað að losa sig við rusl, beðnir að gera það þar til opnað verður. Í neyðartilfellum veður tekið á móti úrgangi sem ekki rotnar, þ.e. frá þeim sem alls ekki hafa aðstæður til að geyma hann. Sorpsamlagið þakkar þolinmæði og skilnig sem félaginu hefur verið sýndur í yfirstandandi rekstrarstöðvun. Sorpsamlag Þingeyinga ehf.  

Á fimmtudaginn í síðustu viku mætti Rannveig Snót, frá Fjöllum í Kelduhverfi, með góðar gjafir til skólans. Það voru fjórar notaðar tölvur með skjám og öllum fylgihlutum. Heilbrigðisstofnun var að skipta út vélum hjá sér og bauð þær notuðu á góðu verði. Rannveig og Óli ákváðu að nota tækifærið og skipta sinni gömlu út. Þeim datt í hug að skólanum gætu nýst svona vélar, en um er að ræða pakka frá Hewlett-Packard sem samanstendur af tölvu, 17" flatskjá, bleksprautuprentara, lylkaborði og mús.

Þann 11. maí verður opið hús og sýning á listaverkum barnanna í Bjarnahúsi. Sýningin er opin frá kl. 10.00 til 12.00 og 13.00 til 15.00. Uppákomur verða kl. 11.00 og 13.30. Allir hjartanlega velkomnir. Börn og kennarar í Bjarnahúsi.

Í vetur hafa flestir skólaliðarnir sem starfa í Borgarhólsskóla setið á skólabekk. Hluti þeirra hefur stundað skólaliðanám við Framhaldsskólann á Húsavík og hluti hefur stundað sitt nám, Grunnnám fyrir skólaliða, hjá Þekkingarsetri Þingeyinga. Alls voru 17 skólaliðar sem tóku þátt í náminu á Þekkingarsetrinu þar af voru 7 frá Borgarhólsskóla. Hópnum var kennt á þremur stöðum í einu, á Húsavík, á Laugum og í Mývatnssveit og var notast við fjarfundabúnað til að koma fróðleiknum til skila á alla staði.

Íþróttahöllin á Húsavík var þétt setin 1. maí þegar ríflega 700 hátíðargestir mættu til að fagna degi verkalýðsins 1. maí. Þrátt fyrir þennan mikla fjölda tókst öllum að finna sér sæti til að njóta skemmtiatriðanna. Hátíðardagskráin var þétt skipuð af úrvalsatriðum. Aðalsteinn Á. Baldursson formaður Verkalýðsfélags Húsavíkur og nágrennis flutti ávarp við setningu hátíðarinnar og Steini Hall flutti síðan Internationalinn í tilefni dagsins.

Magnús Stefánsson félagsmálaráðherra og Bergur Elías Ágústsson sveitarstjóri undirrituðu þann 30. apríl síðast liðinn, þjónustusamning um málefni fatlaðra og samkomulag um ný búsetuúrræði og eflingu dagþjónustu og dagvist fyrir geðfatlað fólk í Þingeyjarsýslum. Með endurnýjun samningsins um málefni fatlaðra heldur Norðurþing áfram að veita fötluðum börnum og fullorðnum í Þingeyjarsýslum þá þjónustu sem er á vegum ríkisins samkvæmt lögum um málefni fatlaðra, nr. 59/1992. Samningurinn er til þriggja ára og samningsfjárhæð er liðlega 280 milljónir króna.

Fjölbreytileikinn má ekki tapast Skipulagsmál á miðbæjar- og hafnarsvæði til skoðunar Sveitarstjórn Norðurþings fékk ráðgjafarfyrirtækið Alta til að greina stöðu og möguleika í skipulagi miðbæjar- og hafnarsvæðis á Húsavík og hófst sú vinna fyrr í mánuðinum.  Fyrsta skrefið fólst í fundum með ýmsum hagsmunaaðilum á svæðinu.  Fundað hefur verið með fulltrúum ferðaþjónustufyrirtækja, flutninga- og fiskvinnslufyrirtækjum, smábátasjómönnum, björgunarsveit og þjónustufyrirtækjum á miðbæjarsvæði næst hafnarsvæðinu, auk fundar með fulltrúum í hafnarstjórn, skipulags- og byggingarnefnd og umhverfis- og tækniráði Norðurþings. Smella hér til að sjá tilkynninguna í heild sinni