Byggðarráð Norðurþings

Fyrir byggðarráði liggur minnisblað til eftirfylgni við beiðni um stuðning sveitarfélagsins við Sparisjóð Suður-Þingeyinga um kaup á stofnfé í sjóðnum en á aðalfundi sjóðsins 2016 var samþykkt heimild til stjórnar um að auka stofnfé sjóðsins um allt að 140 mkr.

Stofnfjárhafar eru um 270 talsins, einstaklingar, sveitarfélög og minni fyrirtæki á starfssvæði sjóðsins. Aðeins eru tveir sparisjóðir starfandi í landinu og hefur það hlutverk að stunda sjálfbæra, svæðisbundna fjármálastarfsemi á grundvelli samfélagslegrar ábyrgðar.

Til fundarinn kemur Ari Teitsson, formaður stjórnar sparisjóðsins til að fara yfir stöðu sjóðsins og fylgja málinu eftir.

Á síðasta sveitarstjórnarfundi var rætt um þá grafalvarlegu stöðu sem uppi er í samfélagi bænda hér í sveitarfélaginu sem og á landsvísu hvað varðar boðað afurðaverð.

Ljóst má þykja að vegna boðaðs tekjutaps bænda ríkir jafnvel óvissa um áframhaldandi búsetu á jörðum í héraðinu. Til að ræða stöðuna koma til fundarins fulltrúar bænda í Norðurþingi þau Einar Ófeigur Björnsson, Lóni II, Sigurður Páll Tryggvason, Þverá og María Svanþrúður Jónsdóttir, héraðsráðunautur.

Fyrirhugað er að forseti Íslands komi í opinbera heimsókn í Norðurþing 18. og 19. október. n.k. Fyrstu drög að dagskrá vegna komu forsetans verða lög fyrir byggðarráð á fundinum.

Nú er unnið að lokahönnun nýrrar slökkvistöðvar á Húsavík og útboð vinnu við byggingu hússins á næsta leyti. Fyrir byggðarráði liggur fyrir ákvarðantaka um útlit hússins eftir að neðangreind bókun var samþykkt á síðasta fundi framkvæmdanefndar: "Framkvæmdanefnd telur bogadregið þak slökkvistöðvar fallegra, en á móti kemur að það mun stinga í stúf við aðrar byggingar í nágrenninu. Einnig er verðmunur á þessum tveimur valkostum töluverður, bogaþaki í óhag. Framkvæmdanefnd vísar málinu til ákvörðunar í byggðaráði. Hjalmar Bogi Hafliðason óskar bókað: Bogadregið þak á þessum stað er ekki fallegra."

Vegna brotthvarfs fulltrúa Norðurþings úr starfi hjá sveitarfélaginu liggur fyrir byggðarráði að tilnefna nýjan fulltrúa í stjórn Hvalasafnsins.

Fyrir fundinum liggur beiðni um rekstrarstyrk til handa Björgunarsveitinni Garðari að upphæð 4.500.000,- kr.

Kemur fram í erindinu að sveitin hafi stólað á velvilja einstaklinga og fyrirtækja þegar kemur að rekstrarfé og eða strykjum vegna kaupa á tækjum og búnaði sem nauðsynleg eru til að gera björgunarsveitinni kleyft að sinna þeim fjölmörgu og fjölbreyttu björgunum og aðstoðarbeiðnum sem koma upp á hverju ári.

Vegna aukinna umsvifa á starfssvæði sveitarinnar síðastliðin ár sem meðal annars má rekja til fjölgunnar ferðamanna og uppbyggingu orkufreks iðnaðar á Bakka, er ljóst að þörf fyrir öfluga og vel tækjum búna sveit hefur aukist. Jafnframt vill Björgunarsveitin Garðar þakka sveitarfélaginu fyrir styrki sem veittir hafa verið svo árum skitpir, sem sannarlega hafa nýst til góðra verka.

Fyrir byggðarráði liggja drög að fjárhagsrömmum fyrir árið 2018.

Fyrir byggðarráði liggja niðurstöður verðfyrirspurnar vegna trygginga Norðurþings.