Ósk um leyfi til deiliskipulagsgerðar á landi Akursels

Teiknistofa Arkitekta, f.h. Samherja fiskeldis ehf, óskar eftir heimild til að hefja vinnu við deiliskipulagningu á jörðinni Akurseli í Öxarfirði eins og nánar er tíundað í erindi.

Samherji fiskeldi ehf hefur sent sveitarfélaginu skipulags- og matslýsingu fyrir deiliskipulag jarðarinnar Akursels í Öxarfirði.

Á 135. fundi skipulags- og framkvæmdaráðs var eftirfarandi bókað:
Skipulags- og framkvæmdaráð leggur til við sveitarstjórn að skipulags- og byggingarfulltrúa verði falið að kynna skipulagslýsinguna.

Nú er lokið kynningartíma skipulagslýsingar vegna deiliskipulags jarðarinnar Akursels í Öxarfirði. Athugasemdir og umsagnir bárust frá 1. Umhverfisstofnun. 2. Hitaveitu Öxarfjarðar. 3. Hverfisráði Öxarfjarðar. 4. Landgræðslunni. 5. Eigendum Ærlækjarsels. 6. Minjastofnun. 7. Heilbrigðiseftirliti Norðurlands eystra. 8. Skipulagsstofnun. 9. Náttúrufræðistofnun Íslands.

Lilja Filippusdóttir skipulagsráðgjafi hefur lagt fram frumhugmynd að deiliskipulagi fyrir hluta jarðarinnar Akursel í Öxarfirði og jafnframt lagt fram hugmynd að breytingu aðalskipulags í tengslum við deiliskipulagstillöguna.

Fyrir liggur frumtillaga að breytingu deiliskipulags fiskeldis í Núpsmýri. Skipulagsbreytingin felur í sér verulega stækkun skipulagssvæðis úr 8,4 ha í 100,3 ha. Stækkunin gengur inn á land Akursels utan um fyrirliggjandi sjótökuhús, svæði undir borholur og önnur mannvirki vestan Brunnár gegnt fiskeldinu í Núpsmýri.

Fyrir liggur frumtillaga að breytingu deiliskipulags fiskeldis í Núpsmýri vegna stækkunar iðnaðarsvæðis Í3 í Öxarfirði vestur yfir Brunná og inn á Austursand í landi Akursels. Iðnaðarsvæðið er stækkað m.a. til að ná yfir fyrirliggjandi mannvirki til sjótöku í fjörunni í landi Akursels. Skilgreindir eru byggingarreitir umhverfis sjótökuhús og annar sem ætlaður er undir fiskimykjutanka og aðra uppbyggingu. Þar fyrir utan er afmarkað svæði undir borholur til vatnstöku og skilgreind svæði fyrir lagnaleiðir. Iðnaðarsvæðið stækkar úr því að vera 5,6 ha utan um núverandi fiskeldisstöð í Núpsmýri yfir í 70,2 ha. Heimild verði fyrir allt að 3.000 tonna framleiðslumagni fiskeldis.

Á 174. fundi skipulags- og framkvæmdaráðs var eftirfarandi bókað:

Skipulags- og framkvæmdaráð leggur til við sveitarstjórn að skipulagsfulltrúa verði falið að kynna skipulagstillöguna á vinnslustigi á opnu húsi og á vefsíðu Norðurþings.

Haldinn var kynningarfundur á opnu húsi á Kópaskeri þann 11. janúar s.l. þar sem frumhugmynd að breytingu deiliskipulags fiskeldis í Núpsmýri var kynnt. Ekki komu fram athugasemdir við kynninguna. Nú liggur fyrir tillaga að breytingu deiliskipulagsins.

Á 181. fundi skipulags- og framkvæmdaráðs var eftirfarandi bókað:

Skipulags- og framkvæmdaráð leggur til við sveitarstjórn að skipulagsfulltrúa verði falið að auglýsa deiliskipulagsbreytinguna skv. ákvæðum skipulagslaga samhliða kynningu breytingar aðalskipulags.