Skipulags- og framkvæmdaráð

Sigurjón Sigurbjörnsson ókar eftir meðmælum vegna umsóknar um hafnsöguréttindi.

Eyrarhóll ehf óskar eftir greiðslufresti á greiðslum fyrir júlí og ágúst til 25. september 2020, sem eru til greiðslu samkvæmt fyrirliggjandi greiðslusamkomulagi á milli fyrirtækisins og Hafnasjóðs.

Fyrir liggur úthlutun úr Styrkvegasjóði Vegagerðarinnar vegna umsókna Norðurþings til viðhalds þar til bærra samgönguleiða fyrir árið 2020. Óskað er afstöðu skipulags- og framkvæmdaráðs til hvaða verkefna styrkvegafé skuli varið í ár með hliðsjón af fyrirliggjandi umsóknum.

Helga Kristinsdóttir f.h. Kirkjugarða Húsavíkur óskar eftir heimild og aðkomu Norðurþings að verki er viðkemur uppsetningu minningarreits í Gamla kirkjugarðinum á Húsavík, sem varðveita mun gamlan legstein sem hefur verið á vergangi í langan tíma. Aðkoma bæjarins að verkinu væri eftirfarandi, fá endurgjaldslaust fyllingarefni sem til þarf, komið á staðinn, frágengið og þjappað ásamt hleðslugrjóti sem einnig er komið á hleðslustað.

Húsavíkurstofa leggur formlega fram beiðni þess efnis að biðskýli sem var í kvikmyndinni Eurovision Song Contest: The Story of Fire Saga verði sett upp á sama stað við höfnina og það var í myndinni.
Húsavíkurstofa óskar einnig eftir að það verði formlega kannaður sá möguleiki að opna tjaldsvæði við Grundargarð yfir háannatíma í sumar, hugsanlega frá miðjum júlí og fyrstu vikuna í ágúst, eins og hefur verið gert yfir Mærudaga.

Borist hefur bréf frá Húnæðis- og mannvirkjastofnun þar sem tilkynnt er um samþykkt umsóknar Norðurþings um stofnframlag á grundvelli laga um almennar íbúðir. Samþykkt er 27% framlag ríkis að fjárhæð 49.372.740 krónur.

Nú liggur fyrir tillaga Alta að skipulagslýsingu vegna deiliskipulags fyrir heilbrigðisstofnanir á Húsavík. Meginmarkmið deiliskipulags verður að skilgreina byggingarskilmála fyrir nýtt hjúkrunarheimili ofan við dvalarheimilið Hvamm og Heilbrigðisstofnun og verður tillaga unnin með hliðsjón af vinningstillögu í hönnunarsamkeppni.

Nú er lokið grenndarkynningu vegna lóðarstofnunar og uppbyggingar spennistöðvarhúss við Uppsalaveg milli Mararbrautar og Garðarsbrautar. Nokkrar athugasemdir bárust frá nágrönnum. Helgi Kristjánsson f.h. Gríms ehf leggst gegn lóðarúthlutuninni í ljósi þess að fyrirhuguð uppbygging muni hindra aðkomu og afnot af lóð fyrirtækisins og telur að Grímur hafi unnið sér hefðarrétt fyrir afnotum svæðisins. Eigendur Garðarsbrautar 44, þ.e. Félag eldri borgara, Guðrún Kristín Jóhannsdóttir og Birgir Steingrímsson telja að lóðarmörk nýrrar lóðar skv. framlagðri teikningu gangi að nokkru inn á þinglýsta lóð Garðarsbrautar 44. Þau telja að fyrirhuguð uppbygging spennistöðvar sé of nærri íbúðum í húsinu og að spennistöðin spilli útsýni af útipalli til sjávar og Kinnarfjalla. Loks gera lóðarhafar Garðarsbrautar 44 athugasemd við að ekki sé lagður meiri metnaður í útlitshönnun fyrirhugaðrar byggingar ef til þess kemur að leyfi verði veitt fyrir henni þrátt fyrir athugasemdir.

Norðlenska óskar eftir samstarfi við sveitarfélagið Norðurþing um að dreifa gori og blóði sem til fellur í sláturtíð Norðlenska til uppgræðslu á gróðurrýru landi í nágrenni Húsavíkur. Erindið var áður tekið fyrir á fundi ráðsins 5. maí og þá ákveðið að skoða nánar landsvæði á Ærvíkurhöfða. Nú liggur fyrir umsögn MAST vegna mögulegrar förgunar gors og blóðvatns á Ærvíkurhöfða. Í bréfi MAST kemur fram að stofnunin telji Ærvíkurhöfða ekki heppilegan til dreifingar á blóðvatni vegna nálægðar við sauðfjárbúskap. Hinsvegar megi nota innihald meltingarvegar á land án vinnslu.

Almennt um girðingarmál í kringum Húsavík.