Skipulags- og framkvæmdaráð

Fermingarsystkini úr árgangi 1961 á Húsavík vilja gefa vegfarendum Húsavíkur bekk til að tylla sér á og njóta líðandi stundar. Jafnframt óskar árgangurinn eftir leyfi til að koma bekknum fyrir við sneiðinginn á milli Höfðavegar 11 og 13.

Orkuveita Húsavíkur ohf. óskar eftir leyfi til að bora allt að 10 hitastigulsholur í landi Húsavíkur og Saltvíkur. Tilgangur holanna eru jarðhitarannsóknir og leit að heitu vatni. Horft er til þess að holur verði 60-90 m djúpar, en þó er mögulegt að farið verði niður í allt að 200 til 250 m dýpi ef tilefni telst til. Ekki liggur fyrir hvar holurnar verða boraðar en reiknað er með að þær verði í kringum Skeiðvöll ofan Laugardals norðan Húsavíkur og einhverjar holur í landi Saltvíkur. Staðsetning holanna tekur mið af því að auðvelt verði að koma tækjum að og frá borstað.

Fyrir skipulags- og framkvæmdaráði liggur erindi frá Fiskbúð Húsavíkur ehf og Flóka ehf þar sem sótt er um leyfi fyrir matarvagni á svokölluðum Guðjohnsensreit á Húsavík.

Beiðni Eysteins Heiðars Kristjánsonar um lausn frá störfum í sveitarstjórn og öðrum ráðum Norðurþings var samþykkt á 154. fundi sveitarstjórnar þann 19. júní sl.

Fyrir skipulags- og framkvæmdaráði liggur að skipa í starfshóp vegna vinnu við aðalskipulag Norðurþings í stað Eysteins.

Fyrir skipulags- og framkvæmdaráði liggja samþykktir um sorphirðu til umfjöllunar, en fyrri umræða fór fram í sveitarstjórn 19. júní sl.

Fyrir liggur tillaga skipulagsráðgjafa að breytingu aðalskipulags á svæði sem afmarkast af Hjarðarhóli í norðri, Garðarsbraut í vestri, Þverholti í suðri og Baughóli í austri. Tillaga að breytingu felur í sér þéttingu byggðar og fjölgun íbúða um allt að 80 á skipulagssvæðinu. Breyting aðalskipulags felur eingöngu í sér breytingu á greinargerð aðalskipulags og skilmálum fyrir uppbyggingu á íbúðarsvæðunum. Samhliða breytingu aðalskipulags hefur verið unnin tillaga að breytingu deiliskipulags sama svæðis.

Fyrir liggur tillaga að heildarendurskoðun deiliskipulags Stórhóls - Hjarðarholtssvæðisins. Í skipulaginu er skilgreindar nýjar lóðir fyrir allt að 65 íbúðir í fjölbýlihúsum, raðhúsum og einbýlishúsum jafnframt því sem heimiluð er fjölgun um allt að 10 íbúða í þegar byggðum húsum. Skipulagið er sett fram í greinargerð með umhverfisskýrslu, deiliskipulagsuppdrætti, sneiðingum og skýringarmyndum.

Verkefnastjóri á velferðarsviði kynnti fyrirhugaða staðsetningu og uppbyggingu á nýjum leikvelli á Hólaravelli, Húsavík.

Sveitarstjóri óskar eftir umfjöllun ráðsins um mögulega lokun svokallaðrar Regnbogabrautar á Húsavík fyrir akandi umferð í júlí 2025, fram yfir verslunarmannahelgi.