Skipulags- og framkvæmdaráð

Kynningu skipulags- og matslýsingar vegna fyrirhugaðra breytinga á aðalskipulagi vegna fjögurra efnistökusvæða er lokið. Umsagnir bárust frá Skipulagsstofnun (bréf dags. 11. júlí), Heilbrigðiseftirliti Norðurlands eystra (bréf dags. 26. júlí), Minjastofnun (bréf dags. 1. ágúst) og Umhverfisstofnun (bréf dags. 24. ágúst).

Skipulagsstofnun bendir á að setja þarf fram í skipulagsbreytingu stefnu um heildarumfang efnistöku í hverri námu, gera þarf grein fyrir hvaða aðrir raunhæfir valkostir eru til efnistöku, bent er á að efnistaka á verndarsvæðum fellur undir 1. viðauka laga um mat á umhverfisáhrifum og endurskoða þarf umfjöllun sem snýr að umhverfismati. Bent er á að hafa samráð við landeigendur á svæðinu og óska leyfis sjávarútvegs og landbúnaðarráðherra þar sem landbúnaðarsvæði er breytt í aðra landnotkun í samræmi við ákvæði jarðalaga.

Heilbrigðiseftirlit Norðurlands eystra gerir ekki athugasemd við lýsinguna.

Minjastofnun kannaði umhverfi námanna fjögurra og kom ekki auga á fornleifar í grennd. Hinsvegar telur stofnunin að gera þurfi grein fyrir umfangi þess svæðis sem verður fyrir raski ef nýting námanna hefst á ný.

Umhverfisstofnun telur brýnt að vinnslu og tímabundnum frágangi sé háttað þannig að sjónræn áhrif verði sem minnst. Í því samhengi bendir stofnunin á vefsíðu namur.is þar sem unnt er nálgast upplýsingar um efnistöku og frágang. Stofnunin gerir ekki athugasemdir við lýsinguna.

Skipulags- og byggingarfulltrúi kynnti tillögu að breytingu aðalskipulags þar sem tekið hefur verið mið af þeim athugasemdum og ábendingum sem fram komu við kynningu lýsingar skipulagstillögunnar.

Umræður í nefnd um sorpmál sveitarfélagins, hver er staðan og hvert er framhaldið.
Smári Jónas Lúðvíksson, umhverfisstjóri Norðurþings fer yfir stöðu sorpmála hjá sveitarfélaginu.

Garðvík ehf. hefur áhuga á að setja upp útitafl á góðum stað í miðbæ Húsavíkur. Taflið yrði gjöf frá fyrirtækinu til samfélagsins á Húsavík.
Taka þarf afstöðu til þess hvort áhugi sé fyrir slíku og ef svo er, hvar því yrði best komið fyrir.

Fyrir liggja drög að samningi milli Norðurþings og Fjallskiladeildar Húsavíkur um úthlutun svæðis í Tröllakoti þar sem Húsavíkurrétt er staðsett.
Skipulags- og framkvæmdaráð þarf að taka afstöðu til samningsins og hvort gengið skuli frá honum á þeim forsendum sem þar koma fram.

Á síðasta kjörtímabili var ákveðið að hefja vinnu við mótun breyttrar aðkomu að tjaldsvæði og íþróttavelli á Húsavik um Auðbrekku. S.l. vetur vaknaði hinsvegar sú hugmynd að aðkoman gæti e.t.v. áfram orðið frá þjóðvegi 85, mögulega í tengslum við vegtengingu af Húsavíkurhöfða inn á þjóðveginn.
Skipulags- og byggingarfulltrúi kynnti stöðu málsins.

Fyrir liggur áður samþykkt fráveitusamþykkt Norðurþings með þeim athugasemdum sem gerðar voru við meðferð málsins hjá Umhverfis- og auðlindaráðuneytinu.
Fyrir skipulags- og framkvæmdaráði liggur að taka ákvörðun um hvort tekið verði tillit til allra þeirra athugasemda sem gerðar hafa verið við samþykktina.

Fyrir liggur samþykkt Norðurþings um hunda- og kattahald í sveitarfélaginu með þeim athugasemdum sem gerðar voru við meðferð málsins hjá Umhverfis- og auðlindaráðuneytinu.
Fyrir skipulags- og framkvæmdaráði liggur að taka ákvörðun um hvort tekið verði tillit til allra þeirra athugasemda sem gerðar hafa verið við samþykktina.

Fyrir liggur tillaga að breyttri gjaldskrá þjónustumiðstöðva í Norðurþingi.

Fyrirliggjandi er ósk frá stjórnendum Borgarhólsskóla um endurnýjun hurðalæsinga í húsnæði skólans.
Undanfarið hefur farið fram undirbúningsvinna vegna verkefnis sem snýr að uppsetningu og endurnýjun bruna- innbrots- og aðgangskerfa í opingberum byggingum Norðurþings.
Þarfagreining hefur farið fram í hluta þeirra bygginga sem um ræðir og er Borgarhólsskóli ein af þeim.

Rúnar Emil Heiðarsson sækir um leyfi til þess að fækka vargfugli í landi Norðurþings. Vargfugl sæki í egg og unga annara tegunda og hefti þar af leiðandi uppvöxt og viðkomu ungfugla þeirra tegunda á svæðinu. Meðal svæða nærri Húsavik sem líða fyrir afrán vargfugla séu skrúðgarður, Botnsvatn, Kaldbakstjarnir og hafnarsvæði. Rúnar Emil telur að vargfugli hafi fjölgað mikið undanfarin ár og að allra hagur liggi í því að halda þeim í skefjum.

Taka þarf skipulega umræðu um framhald málefna þjónustumiðstöðvar á Húsavík t.a.m. þjónustustig, tækjakost, húsnæði og mannaflsþörf.

Halda þarf áfram vinnu við endurskoðun á umferðarmerkingum og umferðarhraða í þéttbýli Norðurþings.
Lögð hefur verið fram tillaga að hraðatakmörkunum á Húsavík sem ekki hefur enn verið tekin afstaða til.